Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 78 Hüküm no: 46 Orijinal metin no: [10a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âlime bt. Abdullah’ın evini Mustafa b. Mahmud’a sattığı Medîne-i Ebâ Eyyûb-i Ensârî -radiye anhu Rabbühü’l-Bârî-’de Veli Baba mahallesinde sâkine olan Âlime bt. Abdullah nâm hâtun mahfil-i kazâda işbu râfi‘ü’l-kitâb Mustafa b. Mahmud nâm kimesne mahzarında bi’t-tav‘i’s-sâf ikrâr ve i‘tirâf edip zikr-i âtî akdin sudûruna değin silk-i mülk ve tasarrufumda ve taht-ı yedimde münselik ve muntazam ve münharit hakkım olup mahalle-i mezbûrede vâki‘ bir tarafı kendi mülk menzilim ve bir tarafı Çengi Kamer vakfı ve bir tarafı el-Hâc Ali b. Ramazan mülkü ve bir tarafı tarîk-i âm ile mahdûd üç bâb fevkānî odayı ve iki sofayı ve bir bâb tahtânî odayı ve fırını ve bi’r-i mâyı ve kenîfi ve muhavvata-i zât-ı eşcâr-ı müsmire ve gayr-ı müsmireyi müştemil cemî‘ mülk menzilimi cemî‘ hukūk ve merâfıkı ile mezbûr Mustafa’ya tarafeynden îcâb ve kabûlü hâvî bey‘-i kat‘î ile fıddî râyic fi’l-vakt yirmi bin cedîd akçeye bey‘ ve teslîm eyledim ol dahi iştirâ ve tesellüm ve kabûl eyledikden sonra semen-i mezbûr yirmi bin akçeyi yedinden tamâmen ahz u kabz eyledim, ba‘de’l-yevm menzil-i mezbûr mezkûr Mustafa Bey’in mülk-i müşterâsıdır keyfe mâ yeşâ’ ve haysü mâ yahtâr mutasarrıf olsun dedikde mukırra-i mezbûre Âlime’nin vech-i mübeyyen üzre cârî olan ikrârını el-mukarru lehü’l-merkūm Mustafa vicâhen ve şifâhen tasdîk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min Saferi’l-hayr li sene erba‘a ve hamsîn ve elf. Şuhûdü’l-hâl: Mahmud Efendi b. Mehmed el-İmâm, Ömer Halîfe b. Musa el-İmâm, Mustafa b. Şaban el-Müezzin, Ali Çelebi b. İsâ el-Kâtib, Mehmed b. Mehmed el-Câbi, Halil Halîfe b. Mehmed el-Câbi, Mustafa Çelebi el-Attâr ve gayruhüm