Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 82 Hüküm no: 52 Orijinal metin no: [10b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Piro v. Semo’nun menzil ve bostan yerini Yorgi v. Yani’ye sattığı Vilâyet-i Rumeli’nde Avlonya sancağında Ergiri kazâsına tâbi‘ Serakneste nâm karyeden Piro v. Semo mahfil-i kazâda karye-i mezbûreden işbu râfi‘ü’l-vesîka Yorgi v. Yani muvâcehesinde bi’t-tav‘ ikrâr ve i‘tirâf edip beyân-ı âtî akdin sudûruna değin silk-i mülk ve tasarrufumda ve taht-ı yedimde muntazam hakkım olup karye-i mezbûrede vâki‘ bir tarafı müşterî-i mezbûr Yorgi mülkü ve bir tarafı Hristo v. Minho mülkü ve bir tarafı Nikola v. Danil mülkü ve taraf-ı âharı tarîk-i âm ile mahdûd harâba müşrif cemî‘ mülk menzil yerimi kâffe-i hukūk ve merâfıkı ile ve menzil-i mezbûra intimâyla tahdîd ve tavsîfden müstağnî lede’l-ahâlî ve’l-cîrân eşcâr-ı müsmire ve gayr-ı müsmireyi müştemil [11a ] cemî‘ mülk bostan yerini âmme-i menâfi‘ ve tarâiki ile mezbûr Yorgi’ye yedi bin cedîd râyic fi’l-vakt akçeye bey‘-i kat‘î ve safka-i vâhide ile bey‘ eyledim ol dahi iştirâ eyledikden sonra semen-i mezbûr yedi bin mezbûrü’n-na‘t akçeyi yedinden tamâmen ahz u kabz eyledim ve zikr olunan emlâki mahallinde kabza mezbûru taslît eyledim dedikde gıbbe’t-tasdîk ve’t-taleb ketb olundu. Fi’l-yevmi’s-sâdis ve’l-ışrîn min Saferi’l-hayr li sene erba‘a ve hamsîn ve elf. Şuhûdü’l-hâl: Receb Efendi b. Abdi, Ali b. Mustafa, Hüseyin b. Ali, Musa b. Mehmed, Baba Yasef, Minho [v.] Zolata, Forta, Minho, Dimo, Duka, Estefar, Yani, Hristo, Nikola, Forto, Biro, Miro ve gayruhüm [mine’l-huzzâr]