Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 83 Hüküm no: 53 Orijinal metin no: [11a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. Üstoyko’nun Matko v. Yuva’ya menzil ve bağ yerini sattığı, yirmi parça tarlasını devrettiği Vilâyet-i Rumeli’nde Ohri sancağında İstarova kazâsına tâbi‘ Baskopiye nâm karyeden Todori v. Üstoyko mahfil-i kazâda yine karye-i mezbûreden işbu râfi‘ü’l-vesîka Matko v. Yuva muvâcehesinde bi’t-tav‘ ikrâr ve i‘tirâf edip zikri âtî akdin sudûruna değin silk-i mülk ve tasarrufumda ve taht-ı yedimde münselik hakkım olup karye-i mezbûrede vâki‘ bir tarafı müşterî-i mezbûr Matko mülkü ve bir tarafı Yuvan v. Niko mülkü ve bir tarafı diğer Yuvan v. Metro mülkü ve bir tarafı tarîk-i âm ile mahdûd harâba müşrif cemî‘ mülk menzil yerimi ve muttasıl bir bâb samanlığı ve mülâsık ma‘lûmü’l-hudûd harâba müşrif bir kıt‘a bağ yerini cemî‘ hukūk ve zerâcîn ve merâfıkı ve kâffe-i menâfi‘i ve tarâiki ile mezbûr Matko’ya iki bin râyic fi’l-vakt akçeye bey‘-i kat‘î ve safka-i vâhide ile bey‘ eyledim ol dahi iştirâ ve kabûl eyledikden sonra beyân-ı âtî tefvîzin sudûruna değin silk-i mülk [ve] tasarrufumda ve taht-ı yedimde muntazam olup karye-i mezbûre sınırı dâhilinde mevâzi‘-i adîdede vâki‘ inde’l-ahâlî ve’l-cîrân ma‘lûmü’l-hudûd ve’l-kıta‘ yirmi kıt‘a tarlalarımın dahi hakk-ı tasarruflarını ma‘rifet-i sâhib-i arzla mezbûr Matko’ya bin beş yüz fıddî nakid ceyyid ve cedîd akçe bedel mukābelesinde ferâğ ve tefvîz eyledim ol dahi tefevvuz ve kabûl eyledikden sonra semen-i mezbûr iki bin mezbûrü’n-na‘t akçe ile bin beş yüz merkūmü’l-vasf akçe ki cem‘an üç bin beş yüz akçeyi mezbûr Matko yedinden tamâmen ahz u kabz eyledim ve zikr olunan emlâk ve arâziyi mahallinde kabz ve tasarrufa mezbûr Matko’yu taslît eyledim ba‘de’l-yevm zikr olunan emlâk mezbûr Matko’nun mülk-i müşterâsı ve müfavvazât-ı mezkûrât dâhil-i taht-ı tasarrufu olmuşdur benim vechen mine’l-vücûh alâka ve hakkım kalmadı dedikde gıbbe’t-tasdîk ve’t-taleb ketb olundu. Fî evâhiri Saferi’l-hayr li sene erba‘a ve hamsîn ve elf. Şuhûdü’l-hâl: Osman Bey b. Ali, Bayram b. Ali, Mehmed b. Hüseyin, Mustafa b. Abdullah, Hüseyin b. Abdullah, Todori, Kigo, Sepko, Parasto, Yuvan’dan ve gayruhüm [mine’l-huzzâr]