Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 84 Hüküm no: 56 Orijinal metin no: [11a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefât eden Meryem bt. Abdullah’ın muhallefâtından beytülmâl hissesinin tahsili için menzilinin müzayede ile Yahya b. Abdullah’a satıldığı Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Veli Baba mahallesinde sâkine iken bundan esbak vefât eden Meryem bt. Abdullah nâm müteveffânın zevc-i metrûkü Mehmed b. Abdullah nâm kimesneden gayrı zâhirde vâris-i ma‘rûfu olmamağla muhallefâtının nısfı mezbûr Mehmed’e intikāl edip ve nısf-ı âharı cânib-i beytülmâle âid olduğu şer‘an mütehakkik oldukdan sonra medîne-i mersûmede bi’l-fi‘l beytülmâl emîni olan Mustafa Çelebi b. Veli nâm kimesne ile zevci mezbûr Mehmed meclis-i şer‘-i hatîr-i lâzımü’t-tevkīrde [11b ] işbu râfi‘ü’l-kitâb Yahya b. Abdullah muvâcehesinde her biri ikrâr ve takrîr-i kelâm kılıp müteveffât-ı mezbûrenin muhallefâtından olup mahalle-i mezbûrede vâki‘ bir tarafı Mustafa Halîfe b. Şaban mülkü ve bir tarafı Kasım Çelebi b. ( ) nâm kâtib mülkü ve bir tarafı Kasab Hasan Çelebi b. Mehmed mülkü ve bir tarafı tarîk-i âm ile mahdûd olup iki bâb tahtânî odayı ve bir su kuyusunu ve kenîfi ve eşcâr-ı müsmire ve gayr-ı müsmireyi muhtevî cüneyneyi müştemil olan menzili sûk-ı sultânîde ve meclis-i tâlibînde kirâren nidâ ve müzâyede olunup rağabât-ı nâs inkıtâ‘ından sonra mezbûr Yahya’nın üzerinde fıddî râyic fi’l-vakt sekiz bin akçede karâr edip bir akçe ziyâde ile âhar tâlibi olmamağın menzil-i mezkûru bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mersûm Yahya’ya meblağ-ı mezbûr sekiz bin akçeye verâset ve emânetimiz hasebiyle bey‘ edip kabz-ı semen ve teslîm-i mebî‘ eyledik ba‘de’l-yevm zikr olunan menzil müşterî-i mezbûrun mülk-i mahz-ı sahîhi ve hakk-ı baht-ı sırfı olmuşdur dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâmin ve’l-ışrîn min Saferi’l-hayr li sene erba‘a ve hamsîn ve elf. Şuhûdü’l-hâl: Mahmud Halîfe b. Mehmed el-İmâm, Ömer Halîfe b. Musa el-Müezzin, Ahmed Beşe b. Abdullah er-Râcil, Mehmed Beşe b. Abdullah er-Râcil, Mustafa b. Mehmed, Hasan b. Mehmed, Mustafa b. Şaban el-Müezzin, Kasım Çelebi b. ( ) el-Kâtib ve gayruhüm [mine]’l-huzzâr