Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 85 Hüküm no: 57 Orijinal metin no: [11b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Komiyo v. Frako’nun babalarından miras kalan menzildeki hissesini kardeşi Yani’ye sattığı İnebahtı sancağına tâbi‘ Gerbeniş’de sâkin Komiyo v. Frako nâm zimmî mahfil-i kazâda li ebeveyn karındaşı râfi‘ü hâze’l-kitâb Yani nâm zimmî mahzarında bi’t-tav‘i’s-sâf ikrâr ve i‘tirâf edip mârrü’z-zikr Gerbeniş’de vâki‘ bir tarafı Dimo v. Melyod mülkü ve bir tarafı Verdi v. Yani mülkü ve bir tarafı dere ve bir tarafı tarîk-i âm ile mahdûd olup bir bâb fevkānî odayı ve altında ahırı ve bir mikdâr bostan yerini ve iki dut ağacını müştemil olan menzilin rub‘u bi-hasebi’l-irsi’ş-şer‘î babam Frako’dan bana intikāl etmişdi hâlen benim hisseme isâbet eden rub‘ hisse-i şer‘iyyemi karındaşım mezbûr Yani’ye cemî‘ hukūk ve merâfıkı ve menâfi‘i ile fıddî râyic fi’l-vakt üç bin yüz yirmi beş akçeye bey‘-i bâtt-ı sahîh-i şer‘î ile bey‘ edip mezbûr Yani dahi iştirâ ve kabûl eylediğinden sonra semeni olan meblağ-ı mezkûru yedinden tamâmen ahz u kabz edip zikr olunan hisse-i rub‘iyyemi mahallinde kabza mezbûr Yani’yi taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sânî ve’l-ışrîn min Saferi’l-hayr li sene erba‘în [ve] hamsîn ve elf. Şuhûdü’l-hâl: Ali Beşe b. Mustafa, İbrahim Çelebi b. Mustafa, Hüseyin Çelebi b. Ali, Musa b. Mehmed, Baba Süleyman b. Turgud, Yani, Yani [v.] Yuvan, Vankola [v.] Terhalo?, Dimo, Niko [v.] Nihoriye, Yani Baba, Franko [v.] Heri, Yorgi [v.] Lago ve gayruhüm