Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 86 Hüküm no: 58 Orijinal metin no: [11b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Panayot v. Dimitri ve Horasani bt. İstemad’ın mülk bağı Hüseyin’in oğulları Ahmed ve Mehmed’e sattıkları Vilâyet-i Rumeli’nde Mora sancağına tâbi‘ Trapoliçe’de Aya Nikola’da Mezotor mahallesi sükkânından Panayot v. Dimitri ve Horasani bt. İstemad nâm kimesneler mahfil-i kazâda işbu râfi‘ü’l-kitâb Ahmed ve Mehmed ibney Hüseyin nâm kimesneler mahzarlarında her biri ikrâr-ı tâm ve takrîr-i kelâm edip mârrü’z-zikr Trapoliçe hudûdu dâhilinde Ayaboska nâm mevzi‘de vâki‘ bir tarafı Panayot v. Kar bağı ve bir tarafı Liko v. Başti bağı ve bir tarafı Teryaki v. Dimo bağı ve bir tarafı tarîk-i âm ile mahdûd olup ilâ hîn-i sudûr-ı hâze’l-akd ale’l-iştirâki’s-seviy mülk-i mahz-ı sahîhimiz olan bağımızı hukūk ve zerâcîn ve âmme-i menâfi‘ ve merâfıkı ile mezbûrân Ahmed ve Mehmed nâm kimesnelere fıddî râyic fi’l-vakt altı bin ceyyid ve cedîd akçeye bey‘-i bâtt-ı sahîh-i şer‘î ile bey‘ edip mezbûrlar dahi iştirâ ve kabûl eylediklerinden sonra semeni olan mezbûr altı bin akçeden her birimizin hissesine isâbet eden üçer bin akçeyi bi’t-tamâm ve’l-kemâl müşteriyân-ı mezbûrânın yedlerinden ahz u kabz eylediğimizden sonra zikr olunan bağı mahallinde kabza mezbûrları taslît eyledik ba‘de’l-yevm zikr olunan bağ mezbûrân Ahmed ve Mehmed’in ale’l-iştirâki’s-seviy mülk-i müşterâlarıdır bizim vechen mine’l-vücûh alâka ve medhalimiz kalmadı dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’s-sâbi‘ ve’l-ışrîn min Saferi’l-hayr li sene erba‘a ve hamsîn ve elf. Şuhûdü’l-hâl: Ahmed Ağa b. İsmail, Hüseyin Ağa b. Şükrullah, Mehmed Ağa b. Abdullah el-Çorbacı, Ali Beşe b. Abdullah, Mehmed Beşe b. Abdullah, Mustafa b. Abdullah, Ramazan b. Mehmed, Abdülfettah b. Mehmed, Ali Beşe b. Mustafa ve gayruhüm [mine’l-huzzâr]