Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 87 Hüküm no: 60 Orijinal metin no: [12a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Usta Şaban’ın vakf ettiği evin hâkim tarafından Hasan b. Ramazan’a tevcîh olunduğu [Derkenâr:] Efendi hazretlerinindir. Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından merhûm el-Hâc Ahmed mahallesinde sâkin iken bundan akdem hatfe enfihî vefât eden sâhibü’l-hayrât merhûm Usta Şaban menzil-i âti’l-beyânı vakf edip külle yevm üç sûre-i İhlâs ve bir Fâtiha-i şerîfe tilâvet etmek üzre süknâsını, süknâya muhtâc olan sulehâya şart ve ta‘yîn ve vakfiye-i ma‘mûlün bihâsında tahsîs ve tansîs ve ba‘de vefâtihî tevcîhini re’y-i hâkimü’ş-şer‘e tefvîz eylediği mahalle-i mezbûrede vâki‘ iki tarafı İsmail Halîfe b. Abdullah menzili ve bir tarafı tarîk-i âm ve bir tarafı tarîk-i hâs ile mahdûd iki bâb fevkānî ve iki bâb tahtânî odayı ve su kuyusunu ve kenîfi ve muhavvatayı müştemil menzili mevkūf-ı mezbûr bundan akdem bin yirmi beş senesinde taraf-ı şer‘den Ramazan Halîfe nâm kimesneye tevcîh olunup târih-i kitâba gelince mutasarrıf olup ba‘de vefâtihî mezbûr Ramazan Halîfe’nin sulbî oğlu olup menzil-i mezbûrda zi’l-yed bulunduğundan mâ‘adâ sulehâdan olan işbu râfi‘ü’l-vesîka Hasan b. Ramazan el-mezbûra ber mûceb-i şart-ı vâkıf menzil-i mevkūf-ı mezbûru işbu kitâb-ı sıhhat nisâb tevkī‘-i refî‘leri ile şeref-yâb olan hâkim-i âdil ve deryâdil ve bî-mu‘âdil ve hâsım-ı âlim [ve] âmil ve fâzıl ve kâmil hazretleri tevcîh buyurmağın bu nemîka-i enîka yed-i tâlibe li ecli’l-vesîka vaz‘ olundu. Fî selhi Saferi’l-hayr li sene erba‘a ve hamsîn ve elf. Şuhûdü’l-hâl: Ekmekçibaşı Pîrî Usta, el-Hâc Bayram b. Aydın el-Müezzin, İbrahim Subaşı b. Ali Çorbacı, muhtesib Mustafa …?, İbrahim b. Mustafa ve gayruhüm