Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 88 Hüküm no: 61 Orijinal metin no: [12a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Dayı b. Ömer’in Senadino v. Manol’e ödünç verdiği parayı muhallefâtından tahsil ettiği Vilâyet-i Rumeli’nde Mizistre sancağında nefs-i kasaba-i Benefşe sâkinlerinden el-Hâc Hüseyin Dayı b. Ömer mahfil-i kazâda vilâyet-i mezbûrede Mizistre kazâsına tâbi‘ Kotça nâm karyede sâkin iken bundan akdem hâlik olan Senadino v. Manol nâm zimmînin verâseti sulbî kebîr oğulları Nikola ve İlya’ya ve sulbiye kebîre kızları Marola ve Yanola ve Hırsanide’ye münhasıra olduğu şer‘an mütehakkik oldukdan sonra kendi tarafından asîl ve kız ve karındaşları taraflarından ikrâr-ı âti’l-beyânı tasdîke vekîl olup nehc-i şer‘î üzre alâ vechi’l-hasm şer‘an vekâleti sâbite olan işbu râfi‘ü’l-vesîka mezbûr Nikola muvâcehesinde ikrâr-ı tâm ve takrîr-i kelâm edip bundan esbak hâlik-i mezbûra yüz on iki buçuk kıt‘a riyâlî guruş-ı kebîr idâne ve teslîm edip ol dahi yedinden kabz ve tesellüm ve mesârifine sarf edip meblağ-ı mezbûr yüz on iki buçuk guruş zimmetinde kalmışidi hâlen hâlik-i mezbûrun cemî‘ muhallefâtına vâzı‘ü’l-yed olan mezbûr Nikola yedinden meblağ-ı mezbûru yedinden tamâmen ahz u kabz eyledim ba‘de’l-yevm hâlik-i mezbûrun muhallefâtından meblağ-ı mezbûr yüz on iki buçuk guruşdan bir akçe ve bir habbe bâkī kalmadı dedikde mukırr-ı mezbûrun vech-i mübeyyen üzre olan ikrâr-ı meşrûhunu el-mukarru lehü’l-merkūm bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Fî selhi Saferi’l-hayr li sene erba‘a ve hamsîn ve elf. Şuhûdü’l-hâl: Turgud Dayı b. Hüseyin, Ahmed Bey b. Ali, Ahmed Beşe b. Yunus, Ahmed Dayı b. Mehmed, Ahmed Çelebi b. İsâ, Musa Bey b. Veli el-Cündî, Abdi Çelebi b. Ahmed, Hüseyin b. Mustafa, Hasan b. Mustafa ve gayruhüm [mine’l-huzzâr]