Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 88 Hüküm no: 62 Orijinal metin no: [12a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Turgud Dayı b. Hüseyin’in Senadino v. Manol’e ödünç verdiği parayı vârislerinden tahsil ettiği Vilâyet-i Rumeli’nde Mizistre sancağında nefs-i kasaba-i Benefşe sâkinlerinden Turgud Dayı b. Hüseyin mahfil-i kazâda vilâyet-i mezbûrede Mizistre kazâsına tâbi‘ Kotça nâm karyede sâkin iken bundan akdem hâlik olan Senadino v. Manol nâm zimmînin verâseti sulbî kebîr oğulları Nikola ve İlya’ya ve sulbiye kebîre kızları Marola ve Yanola ve Hırsanide’ye münhasıra olduğu şer‘an mütehakkika oldukdan sonra kendi tarafından asîl ve karındaşları taraflarından ikrâr-ı âti’l-beyânı tasdîke vekîl olup nehc-i şer‘î üzre alâ vechi’l-hasm şer‘an vekâleti sâbite olan işbu râfi‘ü’l-vesîka mezbûr Nikola muvâcehesinde bi’t-tav‘ ikrâr ve takrîr-i kelâm edip bundan esbak hâlik-i mezbûra altı bin beş yüz fıddî cedîd râyic fi’l-vakt akçe idâne ve teslîm edip ol dahi yedimden kabz ve tesellüm ve mesârifine sarf edip meblağ-ı mezkûr altı bin beş yüz akçe zimmetinde kalmışidi hâlen hâlik-i mezbûrun muhallefâtına vâzı‘ü’l-yed olan mezbûr Nikola yedinden meblağ-ı mezbûru tamâmen ahz u kabz eyledim ba‘de’l-yevm hâlik-i mezbûrun muhallefâtında meblağ-ı mezbûr altı bin beş yüz akçeden bir akçe ve bir habbe hakkım bâkī kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî selhi Saferi’l-hayr li sene erba‘a ve hamsîn ve elf. Şuhûdü’l-hâl: El-Hâc Hüseyin Dayı b. Ömer, Ahmed Bey b. Ali, Ahmed Beşe b. Yunus, Ahmed Dayı b. Mehmed, Ahmed Çelebi b. İsâ, Musa Bey b. Veli el-Cündî, Abdi Çelebi b. Ahmed, Hüseyin b. Mustafa, Hasan b. Mustafa ve gayruhüm [mine’l-huzzâr]