Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 89 Hüküm no: 63 Orijinal metin no: [12b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Yusuf’un tasarrufundaki iki tarlayı Mustafa b. Mustafa’ya devrettiği Vilâyet-i Rumeli’nde Ohri sancağında İsterak kazâsına tâbi‘ Persak nâm karyeden Hasan b. Yusuf mahfil-i kazâda karye-i mezbûreden işbu râfi‘ü’l-vesîka Mustafa b. Mustafa [muvâcehesinde] bi’t-tav‘ ikrâr-ı tâm ve takrîr-i kelâm edip zikr-i âtî tefvîzin sudûruna değin silk-i tasarrufumda ve taht-ı yedimde muntazam olup karye-i mezbûre sınırı dâhilinde Debeşi nâm mahalde vâki‘ bir tarafı mezbûr Mustafa tarlası ve bir tarafı Üveys Hâce tarlası ve bir tarafı Ali Paşa tarlası ve bir tarafı tarîk-i âm ile mahdûd bir kıt‘a tarla ve yine karye-i mezbûre hudûdu dâhilinde vâki‘ iki tarafı tarîk-i âm ve bir tarafı mezbûr Mustafa tarlası ve bir tarafı Musa Beşe b. Abdullah tarlası ile mahdûd bir kıt‘a tarla cem‘an iki kıt‘a tarlalarımın hakk-ı tasarrufunu ma‘rifet-i sâhib-i arzla mezbûr Mustafa’ya üç yüz cedîd râyic fi’l-vakt akçe bedel mukābelesinde ferâğ ve tefvîz eyledim ol dahi tefevvuz ve kabûl eyledikden sonra bedel-i mezbûr üç yüz mezbûrü’n-na‘t akçeyi mezbûr Mustafa yedinden tamâmen ahz u kabz eyledim ve zikr olunan iki kıt‘a tarlayı mahallinde kabza mezbûr Mustafa’yı taslît eyledim dedikde gıbbe’t-tasdîk ve’t-taleb ketb olundu. Fî gurreti şehri Rebî‘ilevvel li sene erba‘a ve hamsîn ve elf. Şuhûdü’l-hâl: Ali Beşe b. Hüseyin, Süleyman b. Eynehan, Mehmed b. Süleyman, Mustafa b. Abdullah, Kasım b. Abdullah ve gayruhüm [mine’l-huzzâr]