Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 90 Hüküm no: 65 Orijinal metin no: [12b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Niko v. Kiro’nun tasarrufundaki tarlayı Kanoş v. Zoto’ya devrettiği Vilâyet-i Rumeli’nde Avlonya sancağında Premedi kazâsına tâbi‘ Delvine nâm karyeden Niko v. Kiro mahfil-i kazâda işbu râfi‘ü’l-vesîka Kanoş v. Zoto muvâcehesinde bi’t-tav‘ ikrâr ve i‘tirâf edip beyânı âtî akdin sudûruna değin silk-i tasarrufumda ve taht-ı yedimde münsecim olup karye-i mezbûre sınırı dâhilinde Korsonca nâm mevzi‘de vâki‘ bir tarafı Doci [v.] Nikola tarlası ve bir tarafı Baro v. Diko tarlası ve bir tarafı Papa Fayo tarlası ve bir tarafı tarîk-i âm ile mahdûd dört dönüm bir kıt‘a tarlamın hakk-ı tasarrufunu ma‘rifet-i sâhib-i arz ile mezbûr Kanoş’a ceyyid cedîd bin üç yüz akçe bedel mukābelesinde ferâğ ve tefvîz eyledim ol dahi tefevvuz ve kabûl eyledikden sonra bedel-i merkūm bin üç yüz mezbûru’l-vasf akçeyi merkūm Kanoş yedinden tamâmen ahz u kabz eyledim ve zikr olunan tarlayı mahallinde kabza mezbûr Kanoş’u taslît eyledim dedikde gıbbe’t-tasdîk ve’t-taleb ketb olundu. Fî yevmi’l-İsneyn es-sânî min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Şaban b. Abdullah, Osman b. Ali, Mehmed b. Abdullah, Ebûbekir b. Mehmed, Hüseyin b. Ali, Kanoş, Rasiko, Niko, Piyo, Kiro ve gayruhüm [mine’l-huzzâr]