Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 91 Hüküm no: 66 Orijinal metin no: [12b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Lanbo’nun mülk menzil ve bağını Lanbo v. Şiro’ya sattığı Vilâyet-i Rumeli’nde İnebahtı sancağında Badracık kazâsına tâbi‘ Zimyano nâm karye sükkânından Dimo v. Lanbo nâm zimmî mahfil-i kazâda işbu râfi‘ü’l-kitâb Lanbo v. Şiro mahzarında bi’t-tav‘i’s-sâf ikrâr ve i‘tirâf edip beyânı âtî akdin sudûruna değin silk-i mülk ve tasarrufumda ve taht-ı yedimde muntazam hakkım olup karye-i merkūmede vâki‘ bir tarafı Zizo v. Kosta menzil[i] ve bir tarafı Yani v. Çukal bostanı ve bir tarafı dere ve bir tarafı tarîk-i âm ile mahdûd bir bâb fevkānî odayı ve altında ahırı ve muttasıl bostan yerini ve bir dut ağacını müştemil cemî‘ mülk menzilimi cemî‘ hukūk ve merâfıkı ile ve yine karye-i mezbûre bağları arasında vâki‘ bir tarafı Todori v. İstiko bağı ve bir tarafı Rizo v. Yorgi bağı ve bir tarafı Yorgi v. Yani bağı ve bir tarafı kendi mülk bağım ile mahdûd on beş çapalık bir kıt‘a yerimi cemî‘ mülk bağımı dahi âmme-i tarâik ve zerâcîn ve menâfi‘iyle mezbûr Lanbo’ya fıddî râyic fi’l-vakt üç bin üç yüz elli akçeye bi-safkatin vâhidetin bey‘-i bâtt-ı sahîh-i şer‘î ile bey‘ eyledim ol dahi iştirâ ve kabûl eyledikden sonra semeni olan meblağ-ı mezbûr üç bin üç yüz elli akçeyi bi’t-tamâm ve’l-kemâl mezbûr Lanbo’nun yedinden ahz u kabz eyledim [13a ] ve zikr olunan menzil ve bağı mahallinde zabt ve kabza mezbûr Lanbo’yu taslît eyledim ba‘de’l-yevm menzil-i mezkûr ile bağ-ı merkūm mezbûr Lanbo’nun mülk-i müşterâsıdır keyfe mâ yeşâ’ ve haysümâ yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti Rebî‘ilevvel li sene erba‘a ve hamsîn ve elf. Şuhûdü’l-hâl: Ali Beşe b. Mustafa, İbrahim Çelebi b. Mustafa, Hüseyin Çelebi b. Ali, Musa Beşe b. Mehmed, Baba Süleyman b. Turgud, Dimo v. Nikola, Dimo v. Yani, Zahragi v. Yani, Todori v. İstiko, Avyoro v. Dizo, Pola v. Mihal, Zizo v. Yorgi ve gayruhüm [mine’l-huzzâr]