Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 91 Hüküm no: 67 Orijinal metin no: [13a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasım b. Halil’in anne ve babasından intikal eden miras hakkını dava etmek ve teslîm almak üzere Osman b. Mehmed’i vekil tayin ettiği Fi’l-asl vilâyet-i Anadolu’da mahmiye-i Urfa’dan olup hâlen medîne-i Ebâ Eyyûb-i Ensârî’de Baba Haydar mahallesinde sâkin Kasım b. Halil nâm kimesne mahfil-i kazâda takrîr-i kelâm ve bast-ı merâm edip babam mezbûr Halil mârrü’z-zikr Urfa’da Beykapısı mahallesinde sâkin iken bundan akdem fevt olup verâseti bana ve li ebeveyn kız karındaşlarım İsmihân ve Hanım ve Rukiye nâm hâtunlar ile vâlidemiz Elif bt. Receb [nâm] hâtuna münhasıra olup kable’l-kısmet vâlidemiz mezbûre Elif dahi fevt olup onun dahi verâseti bana ve merkūmât İsmihân ve Hanım ve Rukiye’ye münhasıra olup ve müteveffiyân-ı mezbûrânın tashîh-i mes’ele-i muhallefâtı kırk sehim olup on altısı bana ve sekizer sehmi mezkûrât İsmihân ve Hanım ve Rukiye’ye isâbet eylediği şer‘an mütehakkika olup ve ben de vâlideynim vefâtında mahmiye-i mersûmede hâzır olmamağla tereke-i müteveffiyân-ı mezbûrânın terekesinden bana isâbet eden on altı sehim hissemi taleb ve da‘vâya ve ahz u kabza ve ba‘dehû bana îsâle ve ahz u kabz tevakkuf eylediği umûrun cümlesine işbu râfi‘ü’l-kitâb Osman b. Mehmed nâm kimesneyi vekîl ve nâib-i menâb nasb eyledim dedikde mezbûr Osman dahi vekâlet-i mezbûreyi kabûl ve hizmet-i lâzımesin edâya ta‘ahhüd edicek mâ vaka‘a bi’t-taleb ketb olundu. Hurrire fi’l-yevmi’s-sâlis min Rebî‘ilevvel li sene erba‘a ve hamsîn ve elf. Şuhûdü’l-hâl: Emirza Bey b. Abdullah, İsmail b. Mahmud, İsmail Beşe b. Harun, Ali Beşe b. Mustafa, Hüseyin Çelebi b. Ali ve gayruhüm [mine’l-huzzâr]