Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 92 Hüküm no: 68 Orijinal metin no: [13a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fıtık hastası olan Tobaro v. Yuvan’ın Zogro v. Yani tarafından tedavi edileceği Havâss-ı Aliyye kazâsı nevâhîsinden Terkos nâhiyesine tâbi‘ Ağaçlı nâm karyeden Tobaro v. Yuvan mahfil-i kazâda medîne-i Hazret-i Ebâ Eyyûb-i Ensârî’de mütemekkin işbu râfi‘ü’l-vesîka Zogro v. Yani muvâcehesinde bi’t-tav‘ ikrâr-ı tâm ve takrîr-i kelâm edip hâlen mübtelâ olduğum maraz-ı fıtığa eczâ-i hâdde-i nâfi‘a ile mu‘âlece için tîb-i hâtır ile nefsimi mezbûr zimmîye teslîm eyledim eğer hîn-i mu‘âlecede bi-emrillâh mezbûr zimmînin yedinde hâlik olursam veresemden ve sâir efrâd-ı âferîdeden bir ferd mezbûr zimmîden dem ve diyetim taleb edip rencîde eylemeyeler dedikde mukırr-ı mezbûrun vech-i mübeyyen üzre olan ikrâr-ı meşrûhunu el-mukarru lehü’l-merkūm bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Fî yevmü’s-Sülesâ es-sâlis min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Receb Efendi b. Abdullah, Halil Efendi b. ( ) el-Mukayyid, İbrahim Beşe b. Çukadâr, Hüseyin b. Ali ve gayruhüm [mine’l-huzzâr]