Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 92 Hüküm no: 69 Orijinal metin no: [13a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Felbo, Dimitri ve Yanoli’nin Ebûbekir Paşa’dan iltizâma aldıkları üç köyden birini Nikola v. Zerendogni’ye iltizâma vererek bedelini aldıkları Vilâyet-i Rumeli’nde Ağrıboz sancağında nefs-i kasaba-i Atina sükkânından Felbo v. Lagzerok, boyacı Dimitri v. ( ) ve Yanoli v. Kotaniç mahfil-i kazâda kasaba-i mezbûreden işbu râfi‘ü’l-vesîka Nikola v. Zerendogni muvâcehesinde her biri takrîr-i kelâm edip işbu elli dört Martı ibtidâsında sene tamâmına değin hâlen kapudân olan umdetü erbâbü’l-izzi ve’l-iclâl ve zübdetü ashâbü’l-mecdi ve’l-ikbâl câmi‘ü’l-mehâsin ve’l-mekârim merci‘ü’l-ekâbir ve’l-e‘âlî Hazret-i Ebûbekir Paşa hazretleri livâ-i mezbûrede Masuye? kazâsına tâbi‘ Eyne nâm karye ve tevâbi‘inden Kolori ve Poro nâm karyeleri bizim üçümüze iki bin beş yüz riyâlî guruşa der-uhde edip biz dahi vech-i muharrer üzre ta‘ahhüd ve iltizâm etmişidik, hâlen zikr olunan karyelerden karye-i mezbûre Kolori’yi ifrâz edip târih-i kitâb senesini Martı ibtidâsından sene tamâmına değin biz dahi yedi yüz kıt‘a riyâlî guruşa mezbûr Nikola’ya der-uhde eyledik ol dahi vech-i muharrer üzre ta‘ahhüd ve iltizâm eyledikden sonra yedinde zikr olunan yedi yüz kıt‘a riyâlî guruşu tamâmen ahz u kabz eyledik dediklerinde mukırrûn-ı mezbûrûnun vech-i mübeyyen üzre olan ikrâr-ı meşrûhunu el-mukarru lehü’l-merkūm Nikola bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis min Rebî‘ilevvel li sene erba‘a ve hamsîn ve elf. Şuhûdü’l-hâl: Mehmed b. Mustafa, Ahmed b. İbrahim, Ali b. Abdullah, Memi b. Ahmed, Murtaza b. Hüseyin Çelebi, Babalı Mustafa, Nikola, Andon, Nikola [v.] Şebela, Niko [v.] Kira, Mayorgaki [v.] Şebela, Yanaki [v.] Lemoni, Nikola [v.] Korga, Yanaki [v.] Panayot ve gayruhüm