Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 93 Hüküm no: 70 Orijinal metin no: [13a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Çavuş’un babasından miras kalan evdeki hissesini Mustafa b. Kurd’a sattığı Vilâyet-i Rumeli’nde Mora sancağında Kartine kazâsına tâbi‘ Espetrop nâm karyede sâkin iken bundan akdem vefât eden Murad b. Hasan nâm müteveffânın verâseti sulbî kebîr oğlu Yusuf Çavuş’a ve sulbiye kebîre kızı Rahime’ye münhasıra olup müteveffâ-yı mezbûrun muhallefâtının tashîh-i mes’elesi beyne’l-verese tashîhan li’s-sak li’z-zekeri misli hazzi’l-ünseyeyn üç sehim i‘tibâr olunup sihâm-ı mezbûreden iki sehmi mezbûr Yusuf Çavuş’a [13b ] ve bir sehmi mezkûre Rahime’ye isâbet eylediği şer‘an mütekarrir olmağın mezbûr Yusuf Çavuş mahfil-i kazâda işbu râfi‘ü’l-vesîka Mustafa b. Kurd muvâcehesinde bi’t-tav‘ ikrâr ve i‘tirâf edip beyânı âtî akdin sudûruna değin kız karındaşım mezkûre Rahime ile ale’l-iştirâk silk-i mülk ve tasarrufumuzda ve taht-ı yedimizde muntazam ve münsecim hakkımız olup karye-i mezbûrede vâki‘ bir tarafı mezbûr Mustafa mülkü ve bir tarafı Ramazan b. Hızır mülkü ve bir tarafı Ali b. Aydın mülkü ve bir tarafı tarîk-i âm ile mahdûd bir bâb fevkānî ve bir bâb tahtânî harâba müşrif oda yerini ve zât-ı eşcâr-ı müsmire ve gayr-ı müsmire muhavvatayı müştemil cemî‘ mülk-i mevrûsum menzil yerini bi-hasebi’l-irsi’ş-şer‘î bana isâbet eden iki sehim hisse-i şer‘iyye-i şâyi‘imi cemî‘ hukūk ve merâfıkı ile mezbûr Mustafa’ya tâmmü’l-vezn sahîhü’l-ayâr yirmi beş kıt‘a riyâlî guruş-ı kebîre bey‘-i kat‘î ile bey‘ eyledim ol dahi iştirâ eyledikden sonra semen-i mezbûr yirmi beş kıt‘a mezbûru’l-vasf guruşu mezbûr Mustafa yedinden tamâmen ahz u kabz eyledim ve menzil-i mezbûrdan zikr olunan iki sehmi kabza mezbûr Mustafa’yı taslît eyledim dedikde gıbbe’t-tasdîk ve’t-taleb ketb olundu. Fî yevmü’s-Sülesâ es-sâlis min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Musli Bey b. Zülfikār, Mehmed Çelebi b. Hân, İsmail Çelebi b. Hân, Mustafa Beşe b. Ali, Süleyman Beşe b. ( ), Mahmud Beşe b. Aydın ve gayruhüm [mine’l-huzzâr]