Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 94 Hüküm no: 71 Orijinal metin no: [13b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi ve Nikola’nın babalarından miras kalan evdeki hisselerini kardeşleri Mihal’e sattıkları Vilâyet-i Rumeli’nde İnebahtı sancağında Çatalca kazâsına tâbi‘ Koştehak nâm karyede sâkin iken bundan akdem hâlik olan Dimo v. Nikola nâm zimmînin verâseti sulbî kebîr oğulları Yorgi ve Nikola’ya ve Mihal nâm zimmîlere münhasıra olduğu şer‘an mütehakkik oldukdan sonra mezbûrân Yorgi ve Nikola mahfil-i kazâda işbu râfi‘ü’l-kitâb mezbûr Mihal muvâcehesinde bi’t-tav‘ her biri ikrâr-ı tâm ve takrîr-i kelâm edip karye-i mezbûrede vâki‘ bir tarafı İstati v. Yani mülkü ve bir tarafı Kosta v. Dimo mülkü ve bir tarafı mezbûr Nikola mülkü ve bir tarafı tarîk-i âm ile mahdûd bir bâb tahtânî odayı ve bir sofayı ve muhavvata zât-ı eşcâr-ı müsmire ve gayr-ı müsmireyi müştemil olup hâlik-i mezbûrdan irs-i şer‘le bize intikāl eden menzilin sülüsânını cemî‘ hudûd ve tevâbi‘i ve cümle hukūk ve menâfi‘iyle mezbûr Mihal’e bey‘-i bâtt-ı kat‘î ile fıddî râyic fi’l-vakt dört bin akçeye bey‘ edip ve mahallinde hisselerimizi kabza mezbûr Mihal’i taslît eyledik dediklerinden sonra menzil-i mezbûrdan mezbûrânın bey‘ eyledikleri üç sehimde birer sehmi olup semen-i mezkûrdan her birine ikişer bin akçe isâbet edip her biri hisse-i ma‘hûdelerini bi’t-tamâm kabz eyledik semen-i mezkûrdan bir akçe hakkımız kalmadı ba‘de’l-yevm menzil-i mezbûrun mecmû‘u mezbûr Mihal’in bi-tarîki’l-irs ve’ş-şirâ mülk-i mahzıdır deyû ikrâr ve i‘tirâf eylediklerinde mukırrân-ı mezbûrânı vech-i meşrûh üzre ikrârlarında müşterî-i mezbûr bi’l-muvâcehe tasdîk edicek mâ vaka‘a bi’t-taleb ketb olundu. Hurrire fi’l-yevmi’r-râbi‘ min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Ali Beşe b. Mustafa, Hüseyin Çelebi b. Mustafa, Musa Beşe b. Mehmed, Baba Süleyman b. Turgud, Dimo v. Mihal, Rizo v. Dimo, Yani v. Yorgi, İstati, Kosta ve gayruhüm [mine’l-huzzâr]