Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 95 Hüküm no: 73 Orijinal metin no: [13b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman b. Mercan’ın Ahmed b. Abdullah’a menzil ve değirmen hissesini sattığı, tasarrufunda olan on kıt‘a tarlayı devrettiği Vilâyet-i Rumeli’nde Paşa sancağında Kolina kazâsına tâbi‘ Langa nâm karyenin sâbıkan sipâhisi olup hâlen Avlonya sancağında Premedi kazâsında Kostayasa nâm karyede sâkin Osman b. Mercan mahfil-i kazâda mârrü’z-zikr Langa’da sâkin işbu râfi‘ü’l-kitâb Ahmed b. Abdullah mahzarında bi’t-tav‘i’s-sâf ikrâr ve i‘tirâf [edip] zikr-i âtî akdin sudûruna değin silk-i mülk ve tasarrufumda ve taht-ı yedimde münselik hakkım olup karye-i mezbûrede vâki‘ bir tarafı müşterî-i mezbûr Ahmed mülkü ve bir tarafı dere ve bir tarafı orman ve bir tarafı tarîk-i âm ile mahdûd harâba müşrif ev yeri ve muhavvata-i zât-ı eşcâr-ı müsmire ve gayr-ı müsmireyi müştemil cemî‘ mülk menzilimi ve yine karye-i mezbûre Langa’da Langa deresi demekle ma‘rûf su ile dâir lede’l-ahâlî ve’l-cîrân ma‘lûmü’l-hudûd bir göz değirmenin ale’l-iştirâki’s-seviy Kopeho v. ( ) nâm zimmî ile taht-ı yedimizde olan değirmenden nısf hisse-i şâyi‘amı kâffe-i hukūk ve merâfıkı ile fıddî râyic fi’l-vakt iki bin akçeye bi-safkatin vâhidetin bey‘ edip ol dahi iştirâ ve kabûl edip semen-i mezkûru [14a ] yedinden ahz u kabz eyledikden sonra beyânı âtî tefvîzin sudûruna değin taht-ı tasarrufumda olup karye-i mezbûre sınırı dâhilinde mevâzi‘-i adîde[de] vâki‘ inde’l-ahâlî ve’l-cîrân ma‘lûmü’l-hudûd ve’l-kıta‘ on kıt‘a tarlalarımın dahi hakk-ı tasarruflarını ma‘rifet-i sâhib-i arzla mezbûr Ahmed’e ferâğ ve tefvîz edip mukābele-i tefvîzde yedinden râyicü’l-vakt bin akçe alıp kabz eylediğimden sonra zikr olunan emlâk ve arâziyi mahallinde kabz ve tasarrufa mezbûr Ahmed’i taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olunup yed-i tâlibe def‘ olundu. Tahrîren fi’l-yevmi’s-sâlis min şehri Rebî‘ilevvel li sene erba‘a ve hamsîn ve elf. Şuhûdü’l-hâl: İbrahim b. Abdullah, İbrahim b. Aydın, Bâli b. Abdullah, Haydar b. Hürrem, Receb Beşe b. Abdullah er-Râcil, Mustafa Beşe b. Abdullah er-Râcil, Ali Beşe b. Mustafa, Hüseyin Çelebi b. Ali, Musa Beşe b. Mehmed ve gayruhüm [mine’l-huzzâr]