Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 96 Hüküm no: 74 Orijinal metin no: [14a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sefer b. Ali’nin vârislerinden Yunus ve Ali’nin miras bağdaki hisselerini Nikola v. Yorgi’ye sattıkları Vilâyet-i Rumeli’nde Mora sancağında Kartine kazâsına tâbi‘ Dimiçana nâm karyede mutavattın iken bundan esbak vefât eden Sefer b. Ali nâm müteveffânın verâseti sulbî kebîr oğulları Mustafa ve Ali ve Yunus ve Mehmed’e münhasıra olduğu şer‘an mütehakkik oldukdan sonra mezbûrân Yunus ve Ali meclis-i şer‘-i kavîm-i vâcibü’t-tekrîmde karye-i mezbûrede işbu râfi‘ü’l-vesîka Nikola v. Yorgi muvâcehesinde her biri asâleten bi’t-tav‘ ikrâr ve i‘tirâf edip zikri âtî akdin sudûruna değin dördümüzün iştirâk-i seviy üzre silk-i mülk ve tasarrufumuzda ve taht-ı yedimizde münselik hakkımız olup karye-i mezbûre bağları arasında Harmanaltı demekle ma‘rûf mevzi‘de vâki‘ bir tarafı Çakıroğlu Pîrî tarlası ve bir tarafı Março v. Dimitri bağı ve bir tarafı Anastas v. Yomo bağı ve bir tarafı Makri v. Nikola bağı ile mahdûd bir kıt‘a cemî‘ mülk-i mevrûs ve müşterek bağdan bi-hasebi’l-irsi’ş-şer‘î ikimize isâbet eden nısf hisse-i şer‘iyye-i şâyi‘amızı cemî‘ hukūk ve zerâcîn ve merâfıkı ile mezbûr Nikola’ya cedîd râyic fi’l-vakt tâmmü’l-vezn sahîhü’l-ayâr yirmi guruşa bey‘-i kat‘î ile bey‘ eyledik ol dahi iştirâ ve kabûl eyledikden sonra semen-i mezbûr yirmi guruşu mezbûr Nikola yedinden tamâmen ahz u kabz eyledik ve zikr olunan nısf bağı mahallinde kabza mezbûr Nikola’yı taslît eyledik dediklerinde gıbbe’t-tasdîk ve’t-taleb ketb olundu. Fî yevmi’l-Erbi‘â’ er-râbi‘ min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Hasan Çelebi b. Abdullah, Hasan Bey b. Cafer, Hüseyin Çelebi b. ( ) Hazînedâr, Kanberzâde Hüseyin Çelebi, Mustafa b. Mehmed, Kah[ra]man b. ( ), Dilâver Bey b. Abdullah, Ali b. Ahmed, Bayram b. Abdullah, Veli b. Mehmed ve gayruhüm [mine’l-huzzâr]