Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 96 Hüküm no: 75 Orijinal metin no: [14a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Salamon v. Mosi’nin menzilini Yasef v. Eliyaz’a sattığı Havâss-ı Aliyye kazâsı tevâbi‘inden kasaba-i Hasköy’de Keçeciler mahallesinde sâkin Katalan cemâ‘atinden Salamon v. Mosi nâm Yahudi mahfil-i kazâda cemâ‘at-i mezbûreden işbu râfi‘ü’l-vesîka Yasef v. Eliyaz nâm Yahudi muvâcehesinde bi’t-tav‘ ikrâr ve i‘tirâf edip zikr-i âtî akdin sudûruna değin silk-i mülk ve tasarrufumda ve taht-ı yedimde muntazam hakkım olup mahalle-i mezbûrede vâki‘ bir tarafı Arslan nâm Yahudi menzili ve bir tarafı kiremitçi Gülbegi nâm Ermeni menzili ve bir tarafı Samson nâm Yahudi menzili ve taraf-ı âharı tarîk-i âm ile mahdûd altı bâb fevkānî odaları ve bir köşkü ve tahta-pûşu ve dört bâb tahtânî odayı ve matbahı ve bir fevkānî sofayı ve fırını ve beş aded su kuyusunu ve tahtânî iki bâb mahzeni ve üç sed zât-ı eşcâr-ı müsmire ve gayr-ı müsmire hadîkayı müştemil cemî‘ mülk menzilimi kâffe-i hukūk ve merâfıkı ile mezbûr Yasef’e tâmmü’l-vezn bin beş yüz kıt‘a riyâlî guruş-ı kebîre bey‘-i bâtt-ı sahîh-i şer‘î ile bey‘ ve teslîm eyledim ol dahi iştirâ ve tesellüm ve kabûl eyledikden sonra semen-i mezbûr bin beş yüz riyâlî guruşu yedinden tamâmen ahz u kabz eyledim ba‘de’l-yevm zikr olunan menzilde vechen mine’l-vücûh alâka ve hakkım kalmadı mezbûr Yasef’in mülk-i müşterâsıdır keyfe mâ yeşâ’ mutasarrıf olsun dedikde gıbbe’t-tasdîk ve’t-taleb kayd şüd. Fî 5 min şehri Rebî‘ilevvel sene 1054. Şuhûdü’l-hâl: Ali b. Mustafa, Hüseyin b. Ali, Mustafa Çelebi b. Veli, Bayram b. Mehmed, Ahrayil, Avraham, Nişan, David ve gayruhüm