Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 97 Hüküm no: 76 Orijinal metin no: [14a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Angilaki’nin mülk menzil, bağ ve samanlığını Manol v. İstemad’a bey‘ bi’l-vefâ yoluyla sattığı Medîne-i Yenişehir müzâfâtından Kuhistân nâhiyesine tâbi‘ Büyük Hırso nâm karye sükkânından olup hâlen medîne-i Ebâ Eyyûb-i Ensârî’de bakkal tâifesinden olan Dimitri v. Angilaki nâm zimmî mahfil-i kazâda işbu râfi‘ü’l-vesîka Manol v. İstemad nâm zimmî muvâcehesinde ikrâr-ı tâm ve takrîr-i kelâm edip karye-i merkūme hudûdu dâhilinde vâki‘ bir tarafı Esteroyko v. Dimitri mülkü ve bir tarafı Baba Yorgi mülkü ve bir tarafı Dimitri v. Aleksandra mülkü ve bir tarafı tarîk-i âm ile mahdûd iki bâb fevkānî odayı ve altında ahırı ve muhavvata-i zât-ı eşcâr-ı müsmire ve gayr-ı müsmireyi müştemil mülk menzilimi ve yine karye-i mezbûre sınırında Şila demekle ma‘rûf mevzi‘de vâki‘ bir tarafı Keriho v. Cevher bağı ve bir tarafı Baroşi v. Liko bağı ve iki tarafı tarîk-i âm ile mahdûd bağımı ve bir bâb samanlığı [14b ] cemî‘ hukūk [ve] menâfi‘ ve merâfıkı ile bi-safkatin vâhidetin târih-i kitâbdan doksan gün tamâmına müeccel olmak üzre bey‘ bi’l-vefâ tarîki ile fıddî râyic fi’l-vakt otuz bir bin iki yüz elli akçeye bey‘ edip mezbûr Manol dahi iştirâ ve kabûl eylediğinden sonra mezbûr Manol’ün yedinden tamâmen otuz bir bin iki yüz elli mezbûrü’n-na‘t akçeyi ahz u kabz eyleyip emlâk-ı mezkûreyi mahallinde kabza mezbûr Manol’ü taslît eyledim dedikde mukırr-ı mezbûrun vech-i muharrer üzre cârî olan ikrârını el-mukarru lehü’l-merkūm Manol vicâhen ve şifâhen tasdîk edicek mâ hüve’l-vâki‘ bi’t-taleb ketb olundu. Fi’l-yevmi’l-hâmis min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Musa Bölükbaşı, Abdülkādir Bölükbaşı, Ali Beşe b. Mustafa, İbrahim Çelebi b. Mustafa, Hüseyin Çelebi b. Ali, Franko v. Dimo, Mihal v. Todori, Yorgi Hamaloğlu, Todori v. Çamor, Mihal [v.] İsteryani ve gayruhüm