Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 99 Hüküm no: 78 Orijinal metin no: [15a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Panayot’un oğulları Avyaro ve Dimo’nun mülk menzillerini Yorgi v. İstani’ye sattıkları Vilâyet-i Rumeli’nde Yenişehir kazâsı nevâhîsinden Kuhistân nâhiyesine tâbi‘ Kalson nâm karyeden Avyaro ve Dimo veledey Panayot nâm zimmîler mahfil-i kazâda işbu râfi‘ü’l-vesîka Yorgi v. İstani muvâcehesinde her biri bi’t-tav‘ ikrâr ve i‘tirâf edip beyânı âtî akdin sudûruna değin her birimizin ale’l-iştirâki’s-seviy silk-i mülk ve tasarrufumuzda ve taht-ı yedimizde muntazam hakkımız olup bir tarafı tarîk-i âm ve iki tarafı Franko v. İskarlet menzili ve çayırı ve bir tarafı müşterî-i mezbûr Yorgi menzili ile mahdûd bir bâb fevkānî çardağı ve altında ahırı ve havluyu müştemil mülk-i mevrûs cemî‘ mülk menzilimizi cemî‘ hukūk ve merâfıkı ile mezbûr Yorgi’ye iki bin beş yüz râyic fi’l-vakt akçeye bey‘-i kat‘î ile bey‘ eyledik ol dahi iştirâ ve kabûl eyledikden sonra semeni olan meblağ-ı mezbûr iki bin beş yüz mezbûrü’l-vasf akçeyi mezbûr Yorgi yedinden tamâmen ahz u kabz eyledik ve zikr olunan menzili mahallinde kabza mezbûr Yorgi’yi taslît eyledik dediklerinde gıbbe’t-tasdîk ve’t-taleb ketb olundu. Fî evâili şehri Rebî‘ilevvel li sene erba‘a ve hamsîn ve elf. Şuhûdü’l-hâl: Ali b. Mustafa, Hüseyin b. Ali, İbrahim b. Mustafa, Bayram b. Mehmed, Yanfat, Yani, Dimo, Zogro, Yorgi, Trandafilo, Andriye, Rizo, Papa Yorgi ve gayruhüm