Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 100 Hüküm no: 79 Orijinal metin no: [15a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Konda bt. Kuka’nın menzil ve bağlarının vekili vâsıtasıyla Rosta v. Koçi’ye satıldığı Vilâyet-i Rumeli’nde Yanya sancağında Koniçe kasabasına tâbi‘ Melenez nâm karyede sâkin iken bundan akdem hâlik olan Kuka v. Drako’nun verâseti hasren sulbiye kebîre kızı Konda nâm Nasrâniyyeye münhasıra olmağla hasbe’l-verâse hâlik-i mezbûrun cemî‘ muhallefâtına vâzı‘ü’l-yed olduğu şer‘an mütekarrir oldukdan sonra mezkûre Konda tarafından husûs-ı âti’l-beyânı ikrâra vekîl olup alâ vechi’l-hasm Duka v. Dimo ve Yano v. Kadedi şehâdetleriyle şer‘an vekâleti sâbite olan Hristo v. Dadi mahfil-i kazâda işbu râfi‘ü’l-vesîka Rosta v. Koçi muvâcehesinde bi’l-vekâle ikrâr-ı tâm ve takrîr-i kelâm edip zikri âtî akdin sudûruna değin müvekkilem mezbûre Konda’nın silk-i mülk ve tasarrufumda ve taht-ı yedimde muntazam hakkı olup karye-i mezbûrede bir tarafı Koka v. Esteyo mülkü ve bir tarafı kendi mülküm ve iki tarafı tarîk-i âm ile mahdûd bir bâb tahtânî odayı ve zât-ı eşcâr-ı müsmire ve gayr-ı müsmire muhavvatayı müştemil cemî‘ mülk-i mevrûs menzilini cemî‘ hukūk ve merâfıkı ile ve yine karye-i mezbûre sınırı dâhilinde Merrişte? nâm mevzi‘de vâki‘ bir tarafı Yakomi deresi ve bir tarafı tarîk-i âm ve bir tarafı Kuka v. Drako tarlası ve bir tarafı müşterî-i mezbûr tarlası ile mahdûd bir dönüm bir kıt‘a cemî‘ mülk-i mevrûs bağını dahi kâffe-i zerâcîn ve tarâiki ile ve yine karye-i mezbûre hudûdu dâhilinde Samannelkesi nâm mahalde vâki‘ iki tarafı mezbûr Nağamon? deresi ve bir tarafı Rodfan nâm dağ ve bir tarafı Safol v. Esteyo bağı ile mahdûd bir kıt‘a cemî‘ mülk-i mevrûs bağını dahi âmme-i zerâcîn ve tevâbi‘ ve levâhıkı ile mezbûr Rosto’ya bi-safkatin vâhidetin iki bin râyic fi’l-vakt akçeye vekâlet-i mahkiyem hasebiyle bey‘ eyledim ol dahi iştirâ eyledikden sonra semen-i mezbûr iki bin akçeyi mezbûr Rosto yedinden tamâmen ahz u kabz eyledim ve zikr olunan emlâki mahallinde kabza mezbûr Rosto’yu taslît eyledim dedikde gıbbe’t-tasdîk ve’t-taleb ketb olundu. Fî evâili şehri Rebî‘ilevvel li sene erba‘a ve hamsîn ve elf. Şuhûdü’l-hâl: Musa Beşe b. Mehmed, Mustafa Çelebi b. Veli, Hüseyin b. Ali, birâderi Mehmed ve gayruhüm [mine’l-huzzâr]