Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 101 Hüküm no: 80 Orijinal metin no: [15b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail Çelebi ile Mehmed Çelebi’nin kullandığı Magoliye adlı köydeki tarlaların tasarruf hakkının Dimitri v. Todori’ye ait olduğu Vilâyet-i Rumeli’nde Mora sancağında Kartine kazâsın[d]a Ma[go]liye nâm karye sükkânından İsmail Çelebi ve Mehmed Çelebi b. Hân nâm kimesneler mahfil-i kazâda işbu râfi‘ü’l-kitâb Dimitri v. Todori nâm zimmî muvâcehesinde her biri ikrâr-ı tâm ve takrîr-i kelâm edip mârrü’z-zikr Kartine’ye tâbi‘ Magoliye nâm karye sınırı dâhilinde Oşron nâm mevzi‘de vâki‘ mezbûr Dimitri’ye intimâ ile tahdîd ve tavsîfden müstağnî olan tarlaları mezbûr Dimitri mârrü’z-zikr Magoliye’de olmamağla biz gasb edip zabt etmiş idik, bizim alâka ve medhalimiz yokdur arâzi-i mezbûrenin hakk-ı tasarrufu mezbûr Dimitri’nindir dediklerinde gıbbe’t-tasdîk ve’t-taleb mâ vaka‘a ketb olunup li ecli’t-temessük yed-i tâlibe def‘ olundu. Fi’l-yevmi’s-sâdis min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Ali Beşe b. Mustafa, İbrahim Çelebi b. Ali, Musa Beşe b. Mehmed, Hüseyin Çelebi b. Ali ve gayruhüm [mine’l-huzzâr]