Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 102 Hüküm no: 82 Orijinal metin no: [15b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vakıf menzilin mutasarrıfı vefât edip süknâsının Mustafa’ya tevcîh olunduğu Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Çavuş Kasım mahallesinde sâkine iken bundan akdem vefât eden Kerime bt. Hüsrev nâm hâtun bin otuz dokuz senesi Zilhiccesi’nde menzil-i âtî zikri vakf edip külle yevm Kur’ân-ı azîmü’ş-şân’dan bir aşr-ı şerîf ve bir Yâsin-i şerîf tilâvet etmek üzre süknâsının evvelâ Sâlih Çelebi b. İnâyetullah nâm kimesneye ba‘de vefâtihî tevcîhi re’y-i hâkimü’ş-şer‘le sulehâdan süknâya muhtâc olanlara vakf ve şart ve vakfiye-i ma‘mûlün bihâsında tahsîs ve ta‘yîn eylediği mahalle-i mezbûrede vâki‘ bir tarafı Şerîfezâde Hüseyin Efendi b. Mehmed el-İmâm mülkü ve bir tarafı Mahmud Dede b. ( ) el-İmâm mülkü ve iki tarafı tarîk-i âma müntehî olup iki bâb fevkānî odayı ve iki sofayı ve bir bâb tahtânî odayı ve bir ahırı ve bir su kuyusunu ve kenîfi müştemil menzil târih-i kitâba gelince mevkūfün leh olan mezbûr Sâlih Çelebi mutasarrıf olup hâlen vefât etmekle menzil-i mezbûrun süknâsı Mustafa Çelebi mahal ve müstahık ve süknâya eşedd-i ihtiyâcı olmağın ber mûceb-i şart-ı vâkıfe menzil-i mezbûrun süknâsı merkūm Mustafa’ya tevcîh olunup işbu hurûf li ecli’t-temessük ketb olundu. Hurrire fi’l-yevmi’s-sâmin min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Hasan Bey b. Hüseyin el-Cündî, İsmail Çelebi b. İbrahim, Mehmed b. Mustafa, Mustafa b. Ahmed, Ali Beşe b. Mustafa ve gayruhüm [mine’l-huzzâr]