Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 105 Hüküm no: 88 Orijinal metin no: [16b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiro v. Andriye’nin tasarrufundaki tarlayı İstali v. Dimo’ya devrettiği Vilâyet-i Rumeli’nde Ohri sancağında Bihilişte kazâsına tâbi‘ Eçmenek nâm karye sükkânından Kiro v. Andriye nâm zimmî meclis-i şer‘-i şerîf-i lâzımü’t-tevkīr ve’t-teşrîfde işbu bâ‘isü’l-kitâb İstali v. Dimo nâm zimmî muvâcehesinde bi’t-tav‘ ve’l-ihtiyâr lâ bi’l-kerh ve’l-icbâr ikrâr ve takrîr-i kelâm edip karye-i mezbûre sınırı ve hudûdu dâhilinde vâki‘ iki tarafdan Koli v. Yorgi tarlası ve bir tarafdan Periko v. Kolo tarlası ve bir tarafdan İstani v. Dimo nâm zimmî tarlası ile mahdûd olup tahmînen üç keyl isti‘âb eden bir kıt‘a tarlamın hakk-ı tasarrufunu sâhib-i arz ma‘rifeti ile merkūm İstani’ye ceyyid ve cedîd altı yüz nakd-i râyic fi’l-vakt fıddî akçeye ferâğ ve tefvîz edip ol dahi ber vech-i meşrûh tefevvuz ve kabûl eyledikden sonra mukābele-i tefvîz olan meblağ-ı mezbûr altı yüz akçeyi bi’t-tamâm ve’l-kemâl mersûm İstali yedinden ahz u kabz edip mârrü’z-zikr tarlayı mahallinde tasarrufa merkūm İstali’yi taslît eyledim ba‘de’l-yevm tarla-yı mahdûd mezbûr merkūm İstali’nin mülk-i müfavvazıdır keyfe mâ yeşâ’ ve yahtâr mutasarrıf olsun dedikde mukırr-ı mezbûrun vech-i muharrer üzre cârî olan ikrârını el-mukarru lehü’l-mezbûr İstali bi’l-muvâcehe tasdîk ve bi’l-müşâfehe tahkīk edicek işbu hurûf gıbbe’t-taleb ketb ve terkīm olunup yed-i tâlibe vaz‘ ve def‘ olundu. Tahrîren fi’l-yevmi’s-sânî min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Ali b. Abdullah, Pervâne b. Abdullah, Joban v. Rayko ve gayruhüm mine’l-hâzırîn