Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 106 Hüküm no: 89 Orijinal metin no: [16b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hâtun bt. Esad Efendi’nin ekmek fırınının Kiro v. Kosta tarafından kiralandığı Mahmiye-i Kostantıniyye -humiyet ani’l-âfât ve’l-beliyye- mahallâtından Mahmud Paşa câmi‘i kurbunda ( ) mahallesi sâkinelerinden fahrü’l-muhadderât zahrü’l-muvakkarât tâcü’l-mestûrât Âişe Hâtun bt. el-merhûm el-mağfûr -ed-dâric ilâ rahmeti Rabbihi’l-Gafûr- Esad Efendi taraf-ı karînü’ş-şereflerinden husûs-ı âti’l-beyânı ikrâra vekîl olup hasm-ı şer‘î-i câhid mahzarında bimâ hüve nehcü’s-sübût vekâleti sâbite olan fahrü’l-eşbâh Ali Bey b. İvaz meclis-i şer‘-i hatîr-i lâzımü’t-tevkīrde işbu râfi‘ü’l-kitâb Kiro v. Kosta nâm zimmî muvâcehesinde bi’l-vekâle ikrâr ve takrîr-i kelâm edip müvekkilem mûmâ-ileyhâ Âişe Hâtun’un silk-i mülkünde muntazam olan emlâkinden medîne-i Ebâ Eyyûb el-Ensârî -radiye anhu Rabbühü’l-Bârî-’de Câmi‘-i Kebîr sûkunda vâki‘ Hâce Efendi fırını demekle ma‘rûf olup müşârün-ileyhâya intimâ ile tahdîdden müstağnî olan habbâz fırınını beynlerinde ilm-i şer‘î-i birle ma‘lûm âlât ve esbâbı ile işbu sene erba‘a ve hamsîn ve elf şehri Rebî‘ilâhiri’nin gurresinden yevmî yirmişer akçeye olmak üzre senede yedi bin iki yüz akçeye merkūm Kiro’ya îcâr ve ol dahi vech-i mübeyyen üzre istîcâr ve kabûl edip kıstü’l-yevmini mâh be-mâh müvekkile-i müşârün-ileyhâya haklaşmak üzre ta‘ahhüd eyledi dedikde vekîl-i mezbûrun minvâl-i muharrer üzre cârî ve sâdır olan ikrâr ve takrîrini el-mukarru lehü’l-merkūm Kiro bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā sebt ü imlâ olundu. Hurrire fî gurreti şehri Rebî‘ilâhir min şühûri sene erba‘a ve hamsîn ve elf. Şuhûdü’l-hâl: Veli Çelebi b. İsâ, Süleyman b. Abdullah, el-Hâc Ahmed Beşe Çukadâr, Mustafa Beşe el-Muhtesib, Ali b. Mustafa, Baba Süleyman el-Muhzır ve gayruhüm