Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 106 Hüküm no: 90 Orijinal metin no: [16b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vaso v. Kiro’nun mülk bağını içindeki fıçı ile birlikte Nikola v. Simo’ya sattığı Vilâyet-i Rumeli’nde Delvine kazâsına tâbi‘ Serakad nâm karye sâkinlerinden Vaso v. Kiro nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Nikola v. Simo muvâcehesinde bi’t-tav‘i’s-sâf ikrâr-ı tâm ve takrîr-i kelâm edip akd-i âtî sudûruna değin silk-i mülk-i sahîhimde münselik olan emlâkden karye-i mezbûre bağları dâhilinde vâki‘ bir tarafdan Filo v. Dimo bağına ve bir tarafdan Dimo v. Simo bağına ve bir tarafdan Yorgova v. İstaso bağına ve bir tarafdan Avasti v. Hristo bağına müntehî dâhilinde kırk müdre hamr alır bir fıçı-i kebîr ile tahmînen on beş çapalık bir kıt‘a mülk bağımı cümle tevâbi‘i ve levâhıkı ve âmme-i menâfi‘ ve merâfıkı ile merkūm Nikola’ya iki bin beş yüz yirmi cedîd ve ceyyid râyic fi’l-vakt akçeye bey‘-i bâtt-ı sahîh ile bey‘ ve kabz-ı semen [17a ] edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm mârrü’z-zikr bağ ve fıçı merkūm Niko[la]’nın mülk-i müşterâ-yı sarîhidir keyfe mâ yeşâ’ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr Niko[la] bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā sebt ve imlâ olundu. Hurrire fi’t-târihi’l-mezbûr. Şuhûdü’l-hâl: Mustafa Beşe b. Abdullah, Mustafa Beşe el-Muhtesib, Ali Beşe b. Mustafa, Süleyman Baba b. Turgud, Filo v. Dimo, Dimo v. Üstiyora ve gayruhüm mine’l-huzzâr