Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 108 Hüküm no: 93 Orijinal metin no: [17a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban b. Ebûbekir’in menzilini Belkıs Hâtun bt. Mehmed ve Mehmed b. Ahmed’e sattığı Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî- mahallâtından Evlice Baba mahallesi sükkânından Şaban b. Ebûbekir nâm kimesne meclis-i şer‘-i şerîf-i lâzımü’t-tevkīrde Belkıs Hâtun bt. Mehmed tarafından ikrâr-ı âti’l-beyânı tasdîke vekîl olup bimâ hüve nehcü’s-sübût şer‘an vekâleti sâbite olan ve yine kendi tarafından asîl olan işbu râfi‘ü’l-kitâb mezbûr Mehmed b. Ahmed nâm kimesne muvâcehesinde bi’t-tav‘ ve’r-rızâ ikrâr ve i‘tirâf edip zikr-i âtî akdin sudûruna değin silk-i mülk ve tasarrufumda münselik olup mahalle-i mezbûrede vâki‘ bir tarafdan Kamerşah Hâtun mülküne ve bir tarafdan Kurd Beşe mülküne ve bir tarafdan İsmail nâm haddâd mülküne ve bir tarafdan ba‘zan vâdi ve ba‘zan tarîk-i âm ile mahdûd iki bâb tahtânî odayı ve sundurmayı ve bi’r-i mâyı ve kenîfi ve zât-ı eşcâr-ı müsmire ve gayr-ı müsmire bahçeyi müştemil mülk menzili cümle tevâbi‘ ve levâhıkı ve kâffe-i menâfi‘ ve merâfıkı ile mezbûrân Belkıs ve Mehmed’e dört bin sekiz yüz fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm eyledim onlar dahi ale’l-iştirâki’s-seviy iştirâ ve tesellüm ve kabûl eylediklerinden sonra semeni olan meblağ-ı sâlifü’z-zikr dört bin sekiz yüz mezbûrü’n-na‘t akçeyi mezkûrâ[n] Belkıs ve Mehmed yedlerinden bi’t-tamâm ve’l-kemâl ahz u kabz eyledim, ba‘de’l-yevm menzil-i mahdûd-ı merkūmda vechen mine’l-vücûh ve sebeben mine’l-esbâb alâka ve medhalim kalmayıp mezbûrân Belkıs ve Mehmed’in mülk-i müşterâları olmuşdur dedikde mukırr-ı merkūm Şaban’ı ikrâr-ı meşrûhunda el-mukarru [lehü]’l-merkūm Mehmed bi’l-vekâle ve bi’l-asâle vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb ve imlâ olundu. Hurrire fi’l-yevmi’s-sâdis min şehri Rebî‘ilâhir li sene erba‘a ve hamsîn ve elf min hicreti men lehü’l-izzü ve’ş-şeref. Şuhûdü’l-hâl: Mahmud Efendi b. Mehmed el-İmâm, Ömer Halîfe b. Musa el-Müezzin, es-Seyyid Ahmed Çelebi b. Seyyid Mustafa, Ahmed Beşe er-Râcil, Ebûbekir b. Ali, Ali b. Ebûbekir, Hüseyin b. Hasan, Kurd Beşe b. Abdullah ve gayruhüm mine’l-huzzâr