Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 109 Hüküm no: 94 Orijinal metin no: [17a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Helvacı Hamza b. Mehmed’in Bağdadizâde Hasan Çelebi b. Ahmed Efendi’ye sermaye olarak aldığı para ile dükkânının kirasından borcu olduğu Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Davud Ağa mahallesinde sâkin zahrü’l-müderrisîni’l-kirâm Bağdâdîzâde Hasan Çelebi b. Ahmed Efendi meclis-i şer‘-i hatîr-i lâzımü’t-tevkīrde medîne-i mezbûrede Çömlekçiler sûkunda sâkin Âsam? Helvacı demekle ma‘rûf Hamza b. Mehmed nâm kimesneyi ihzâr ve mahzarında üzerinde da‘vâ ve takrîr-i kelâm edip bundan akdem bin elli Muharremü’l-harâmı’nın gurresinde merkūm Hamza sûk-ı mezkûrede vâki‘ mülk helvacı dükkânımda helvacılık işlemek için mezbûr Hamza’ya dükkân-ı mezkûru senede bin iki yüz akçe kirâ vermek üzre cedîd ve ceyyid râyic [17b ] fi’l-vakt üç bin akçe sermâye verip merkūm Hamza dahi minvâl-i muharrer üzre ahz ve kabûl etmişdi el-hâletü hâzihî dükkân-ı merkūm kirâsından on beş ayda mezbûr Hamza üzerinde müctemi‘a olan bin beş yüz akçe ve meblağ-ı mersûm üç bin akçe sermâye ki cem‘an dört bin beş yüz akçeyi Hamza’dan taleb ederim suâl olunup alıverilmesi matlûbumdur dedikde gıbbe’s-suâl ve akībe’l-istintâk mezbûr Hamza vech-i mübeyyen üzre kirâ ve sermâyeden müşârün-ileyh Hasan Çelebi’ye zimmetinde dört bin beş yüz akçe lâzımü’l-edâ ve vâcibü’l-kazâ deyni olduğuna mukır ve mu‘terif olmağın meblağ-ı mezbûrun mûmâ-ileyh Hasan Çelebi’ye edâsına merkūm Hamza’ya tenbîh birle mâ hüve’l-vâki‘ gıbbe’t-taleb ketb ve imlâ ve tahrîr-i inşâ olunup men lehü’t-taleb yedine vaz‘ ve def‘ olundu. Hurrire fî gurreti şehri Rebî‘ilâhir min şühûri sene erba‘a ve hamsîn ve elf. Şuhûdü’l-hâl: Mustafa Beşe b. Mehmed el-Muhtesib, Ali b. Mustafa, Hüseyin Çelebi b. Ali, Baba Süleyman ve gayruhüm mine’l-hâzırîn