Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 109 Hüküm no: 95 Orijinal metin no: [17b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Agora ve Morafa’ya miras kalan evin babalarının borçları ve nafaka ihtiyaçları için müzayede ile İstati v. Rizo’ya satıldığı Vilâyet-i Rumeli’nde Badracık kazâsına tâbi‘ Perlefte nâm karyede sâkin iken bundan akdem mürd olan Şiro v. Nikoharake? nâm zimmînin verâseti sulbiye sagīre kızları Agora ve Morafa’ya münhasıra olduğu şer‘an mütehakkik oldukdan sonra sagīretân-ı mezbûretânın tesviye-i umûrlarını kıbel-i şer‘-i kavîmden mansûb vasîleri olan İstati v. Niko nâm zimmî mahfil-i kazâda yine karye-i mezbûrede sâkin işbu râfi‘ü’l-kitâb İstati v. Rizo mahzarında ikrâr ve takrîr-i kelâm edip hâlik-i mezbûrun cemî‘ metrûkâtından olup karye-i mezbûrede vâki‘ bir tarafdan Polo v. Falas mülkü ve bir tarafdan Rizo v. ( ) mülkü ve bir tarafdan Niko v. İkşiro mülkü ve bir tarafdan tarîk-i âm ile mahdûd bir bâb tahtânî odayı ve bostan yerini müştemil menzilden gayrı ism-i mâl ıtlâk olunur bir şeyi olmamağın hâlik-i mezbûrun düyûn-ı müsbetesi ve sagīretân-ı mezbûretânın zarûret-i nafakaları için akārı izn-i hâkimü’ş-şer‘ ile bey‘ olunmak lâzım gelmeğin sûk-ı sultânîde beyne’t-tâlibîn ve’r-ragibîn üç ay mikdârı nidâ ve müzâyede olunup rağabât-ı nâs bi’l-külliyye münkatı‘a oldukdan sonra merkūm İstati üzerinde iki bin akçede karâr edip ziyâde ile tâlib-i âhar zuhûr etmemekle vesâyetim hasebiyle hîn-i akidde semeni olan meblağ-ı mezbûr iki bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ eyledim ol dahi vech-i muharrer üzre iştirâ ve kabûl eyledikden sonra semeni olan meblağ-ı mezbûr iki bin akçeyi vesâyetim hasebiyle merkūm İstati yedinden tamâmen ahz u kabz eyleyip zikr olunan menzili mahallinde ahz u kabza mezbûr İstati’yi taslît eyledim dedikde vasiyy-i mezbûr İstati’yi ikrâr-ı meşrûhunda el-mukarru lehü’l-merkūm vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb ve imlâ olundu. Hurrire fi’l-yevmi’s-sâdis min şehri Rebî‘ilâhir li sene 1054. Şuhûdü’l-hâl: İstrati v. Franko, Niko v. Faşa?, Todori v. Dimadi, Dirlo v. Yorgi, Niko v. Manol ve gayruhüm mine’l-huzzâr