Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 110 Hüküm no: 96 Orijinal metin no: [17b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Murtaza’nın mülk bahçesini Abdülkerim Çelebi b. Mehmed’e sattığı Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Ali Paşa mahallesinde sâkin Mehmed b. Murtaza meclis-i şer‘-i hatîr-i lâzımü’t-tevkīrde işbu hâmilü’l-kitâb Abdülkerim Çelebi b. Mehmed mahzarında bi’t-tav‘ ve’r-rızâ ikrâr ve takrîr-i kelâm edip akd-i âtî sudûruna değin silk-i mülkümde münselik olan emlâkden mahalle-i mezbûrede vâki‘ iki tarafdan müşterî-i merkūm Abdülkerim mülküne ve bir tarafdan yine benim mülküme ve bir tarafdan merhûm Ali Paşa vakfı olan bostana müntehî tûlen yirmi yedi ve arzan iki zirâ‘ altı parmak mülk bahçe yerini cümle tevâbi‘ ve levâhıkı ve âmme-i menâfi‘ ve merâfıkı ile merkūm Abdülkerim Çelebi’ye bin cedîd ve ceyyid râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm ve ol dahi vech-i mübeyyen üzre iştirâ ve tesellüm ettikden sonra semeni olan meblağ-ı mersûm bin nakd-i mezbûrü’n-na‘t akçeyi mezbûr Abdülkerim Çelebi yedinden bi’t-tamâm ve’l-kemâl ahz u kabz eyledim ba‘de’l-yevm zikr olunan mülk bahçeyi merkūm Abdülkerim Çelebi’nin mülk-i müşterâ-yı sarîhidir keyfe mâ yeşâ’ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî ve sâdır olan ikrâr ve takrîrini el-mukarru lehü’l-mezbûr Abdülkerim Çelebi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ve inşâ olunup yed-i tâlibe vaz‘ olundu. Hurrire fi’l-yevmi’s-sâdis min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Fahrü’l-eimme Şeyhzâde Mehmed Efendi, Mehmed Çelebi b. Hasan el-Müezzin, Mehmed Beşe b. Abdülhalim, İbrahim Çelebi b. Mehmed, Mustafa Bey b. Abdullah, Mustafa Beşe el-Muhtesib ve gayruhüm mine’l-huzzâr