Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 111 Hüküm no: 97 Orijinal metin no: [18a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nesli Hâtun bt. Mehmed’in evini Hacı Mehmed Vakfı’na bey‘ bi’l-istiğlâl yoluyla sattığı Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Emânî Çelebi mahallesinde sâkine Nesli Hâtun bt. Mehmed nâm hâtun meclisü’ş-şerî‘ati’ş-şerîfeti’l-garrâ ve mahfilü’t-tarîkati’r-refî‘ati’z-zehrâda ikrâr ve i‘tirâf edip bu akdin sudûruna değin kendisine âid mülkü olup yedinde ve taht-ı tasarrufunda bulunan mahalle-i mezbûrede vâki‘ bir tarafdan İsmihân bt. Mehmed mülkü ve bir tarafdan Safâyî Efendi bahçesi ve bir tarafdan Hamza Ağa mülkü ve bir tarafdan tarîk-i hâs ile mahdûd olan cemî‘ menzilini bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık kadri ve nisâbı altmış iki buçuk kıt‘a riyâlî guruş i‘tibâr olunur harbî sikke ile meskûk kıt‘a-i fıddî semen-i mu‘ayyen-i makbûza hâmil-i hâze’l-kitâb mahalle-i mezbûrede vâki‘ el-merhûm el-Hâc Mehmed vakfı’na mütevellî olan zahrü’l-hutebâ Ahmed Efendi b. Osman’a bey‘ etmeğin ol dahi vakf-ı mezbûr malı ile ondan istiğlâlen iştirâ eyleyip bey‘ ve iştirâ-i sahîhayn-i şer‘iyyeyn eyledikden sonra menzil-i mezbûru ba‘de’t-tahliyye ve’t-tekābuz işbu kitâbın zeylindeki târihden gurre-i şehr-i Rebî‘ülevvel’den sene-i kâmile tamâmına değin bu müddet için mikdârı altı yüz dirhem mezbûrü’n-na‘t ücret-i mu‘ayyeneye istîcâr eyledikde mütevellî dahi ona îcâr etmeğin îcâr ve istîcâr-ı sarîhayn-i mer‘iyyeyn olup ikrâr-ı sahîh-i şer‘î ve i‘tirâf-ı sarîh-i mer‘î ile ikrâr ve i‘tirâf ettikden sonra mütevelli’l-mezbûr kıbelinden dahi vicâhen ve şifâhen tasdîk olunup [kayd olundu]. Cerâ zâlike ve hurrire fi’l-yevmi’s-sâbi‘ min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Mehmed Halîfe b. Perviz el-İmâm, Hüseyin Halîfe b. ( ) el-İmâm, Mahmud b. Hasan, Bayram b. Kaya, Hüseyin Çelebi b. Ali el-Muhzır, Baba Süleyman b. Turgud ve gayruhüm mine’l-hâzırîn