Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 111 Hüküm no: 98 Orijinal metin no: [18a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Babası ölen Mustafa b. Mehmed’i annesi Râziye Hâtun bt. Abdullah’ın yetiştireceği ve babasından kalan evle bir ilgisinin olmadığını ikrârı Kazâ-i Havâss-ı Aliyye müzâfâtından Terkos nâhiyesine tâbi‘ Yeniköy demekle ma‘rûf karye sâkinelerinden Râziye Hâtun bt. Abdullah meclis-i şer‘-i hatîr-i lâzımü’t-tevkīrde işbu sâhibü’l-kitâb Ali b. Mustafa mahzarında ikrâr ve takrîr-i kelâm edip zevcim olup bundan akdem karye-i mezbûrede sâkin iken fevt olan zevcim Mehmed b. Mustafa Bey nâm müteveffânın mezbûr Ali li ebeveyn karındaşı olmağla zevcim mezbûr Mehmed’in firâşından hâsıl olup benden tevellüd eden Mustafa b. Mehmed nâm sagīri benden tefrîk murâd etmekle ben dahi sagīr-i mezbûru bilâ-nafaka beslemek ve hadd-i bülûğ [ve] rüşde değin terbiye etmek üzre müte‘ahhid olup ve karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd zevcim müteveffâ-yı mezbûr Mehmed’den sagīr-i mersûm Mustafa’ya irs-i şer‘le intikāl edip mülk-i mevrûsu olan menzilde dahi kat‘â alâka ve medhalim yokdur dedikde mukırra-i mezbûre Râziye Hâtun’un vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr Ali bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ve imlâ ve tahrîr-i inşâ olundu. Hurrire fi’l-yevmi’s-sâbi‘ min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Hüseyin b. Derviş, Mehmed b. Muslu, Mustafa b. Mehmed, Mehmed b. Mustafa, Hacı b. Bayram ve gayruhüm mine’l-huzzâr