Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 112 Hüküm no: 99 Orijinal metin no: [18a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yazıcıoğlu Hırsonos v. Paskal, Londari v. Mavrodi ve Mihail v. Kosta’nın her birinin Ayastefanos köyündeki zimmîlere borçları olduğunu ikrârları Kazâ-i Havâss-ı Aliyye tevâbi‘inden Ayastefanos nâm karyede sâkin Yazıcıoğlu Hırsonos v. Paskal ve Londari v. Mavrodi ve Mihail v. Kosta nâm zimmîler meclis-i şer‘-i hatîr-i lâzımü’t-tevkīrde karye-i mesfûreden işbu ashâbü’l-kitâb Papa Velisadi v. Dimo ve Nekite v. Dimitri ve Yorgaki v. Paros ve Dimitri v. Papa Yani ve Apostol v. Yorgi ve sâirleri muvâcehesinde bi’t-tav‘ ve’r-rızâ her biri ikrâr-ı tâm ve takrîr-i kelâm edip karye-i mezbûre zimmîlerine cihet-i deyn-i şer‘îden her birimizin zimmetinde edâsı lâzım gelen beşer bin beşer yüz akçeden ki cem‘an mersûmûn zimmîlere zimmetimizde lâzımü’l-edâ ve vâcibü’l-kazâ on altı bin beş yüz ceyyid ve cedîd râyic fi’l-vakt deynimiz vardır dediklerinde mukırrûn-ı mezkûrûn Hırsonos ve Londari ve Mihal’in vech-i mübeyyen üzre cârî ve sâdır olan ikrâr ve takrîrini el-mukarru lehümü’l-mezkûrûn bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā sebt olundu. Hurrire fi’l-yevmi’s-sâbi‘ min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Mustafa Beşe b. Mehmed el-Muhtesib, Ali Beşe b. Mustafa el-Muhzır, Baba Süleyman el-Muhzır, Musa b. Hüseyin ve gayruhüm mine’l-huzzâr