Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 113 Hüküm no: 100 Orijinal metin no: [18b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Nikola’nın Süleyman b. Abdullah ile olan ödünç davası için Yanaki v. Satoki’yi vekil tayin ettiği Kazâ-i Havâss-ı Aliyye müzâfâtından Büyükçekmece nâhiyesine tâbi‘ Kalikratya nâm karyede sâkin Dimitri v. Nikola nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Yanaki v. Satoki nâm zimmî muvâcehesinde ikrâr ve takrîr-i kelâm edip bundan akdem karye-i mezbûrede sâkin Süleyman b. Abdullah nâm kimesneden dört bin akçe istikrâz edip mukābelesinde karye-i mezbûrede vâki‘ lede’l-ahâlî ma‘lûmü’l-hudûd mülk menzilimi rehin vaz‘ etmişidim, hâlen merkūm Süleyman bi-gayr-ı vech-i şer‘î mu‘âmele nâmına benden on beş bin cedîd ve ceyyid râyic fi’l-vakt akçe taleb edip fekk-i rehin etmemeğin husûs-ı mezbûru merkūm Süleyman ile da‘vâ ve talebe ve lede’l-hükkâmi’l-kirâm mürâfa‘a ve müsâlahaya mezbûr Yanaki’yi tarafımdan vekîl ve kendi menâbıma nâib nasb ve ta‘yîn eyledim dedikde merkūm Yanaki dahi vech-i mübeyyen üzre vekâlet-i mezbûreyi kabûl ve hizmet-i lâzımesini edâ ve kıyâma müte‘ahhid olmağın mâ hüve’l-vâki‘ bi’t-taleb gıbbe’l-ibtigā sebt ve imlâ ve tahrîr-i inşâ olundu. Hurrire fi’l-yevmi’s-sâmin min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Yusuf Beşe b. Abdullah, el-Hâc Ahmed Beşe Çukadâr, Ali Beşe b. Mustafa, Baba Süleyman ve gayruhüm mine’l-huzzâr