Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 113 Hüküm no: 101 Orijinal metin no: [18b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ezmerağda bt. Dini’nin mülk bağını Yamandi v. Manol’e sattığı Havâss-ı Aliyye kazâsına tâbi‘ Ayastefanos nâm karye sâkinelerinden Ezmerağda bt. Dini nâm Nasrâniyye meclis-i şer‘-i hatîr-i lâzımü’t-tevkīrde işbu hâmilü’l-kitâb Yamandi v. Manol nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i mezbûre bağları dâhilinde vâki‘ bir tarafdan Apostol v. ( ) bağına ve bir tarafdan Hırsosaklı v. Panayot bağına ve bir tarafdan Yani v. ( ) bağına ve bir tarafdan Mihail v. ( ) tarlasına müntehî tahmînen altı dönüm bir kıt‘a mülk bağımı cümle tevâbi‘ ve levâhıkı ve âmme-i menâfi‘ ve merâfıkı ile merkūm Yamandi’ye beş bin cedîd ve ceyyid râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm ve ol dahi vech-i mübeyyen üzre iştirâ ve tesellüm ettikden sonra semeni olan meblağ-ı mezbûr beş bin nakd-i mezbûrü’n-na‘t akçeyi merkūm Yamandi yedinden bi’t-tamâm ve’l-kemâl ahz u kabz eyledim ba‘de’l-yevm zikr olunan bağ mezbûr Yamandi’nin mülk-i müşterâ-yı sarîhidir keyfe mâ yeşâ’ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Yamandi bi’l-muvâcehe tasdîk edicek mâ hüve’l-vâki‘ bi’t-taleb ketb ve terkīm olundu. Tahrîr[en] fi’l-yevmi’l-hâmis min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Mehmed Çelebi [b.] Abdülkādir el-Müezzin, Mustafa Çelebi b. İbrahim el-Cündî, Ebûbekir b. Kerim, Abdurrahman b. Abdullah, Ali Beşe b. Mustafa, Dimitri v. Yanderi, Aleksi v. Panayot, Harasor v. Kiryazi, Yani v. Nidari, Yorgo v. Kosta ve gayruhüm mine’l-huzzâr