Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 114 Hüküm no: 102 Orijinal metin no: [18b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâkine Hâtun bt. Ali’nin Emine Hâtun bt. Halil’e ödünç verdiği parayı tahsil ettiği Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Süleyman Çelebi mahallesi sâkinelerinden Sâkine Hâtun bt. Ali meclis-i şer‘-i hatîr-i lâzımü’t-tevkīrde işbu râfi‘atü’l-vesîka yine mahalle-i mezkûrede sâkine Emine Hâtun bt. Halil muvâcehesinde bi’t-tav‘ ve’r-rızâ lâ bi’l-kerh ve’l-cebr ikrâr ve i‘tirâf edip bundan akdem merkūme Emine Hâtun istikrâz ve tesellüm edip zimmetinde mütekarrir karz-ı şer‘îden bana vâcibü’l-edâ ve lâzımü’l-kazâ deyni olan râyic fi’l-vakt fıddî bin iki yüz kırk akçeyi merkūme Emine Hâtun yedinden bi’t-tamâm ve’l-kemâl ahz u kabz eyledim meblağ-ı merkūm bin iki yüz kırk akçeden mezbûre Emine Hâtun zimmetinde bir akçe ve bir habbe hakkım kalmadı dedikde mukırra-i mezbûrenin vech-i mübeyyen üzre cârî ve sâdır olan ikrâr-ı meşrûhunu el-mukarretü lehü’l-merkūme bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Cerâ zâlike ve hurrire fi’l-yevmi’l-âşir min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Ali Bey Subaşı, İbrahim Çelebi el-Muhzır, Mustafa Çelebi b. Veli, Ali Beşe el-Muhzır ve gayruhüm mine’l-huzzâr