Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 116 Hüküm no: 104 Orijinal metin no: [19b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefât eden İsmail Bey’in mahlûl olan tımarının ferâğ işlemleri ve ferâğ bedeline dâir oğlu Hasan’ın vasîsi Musli Bey ile Mustafa Bey b. Ali arasındaki işlemler Vilâyet-i Rumeli’nde Mora sancağında Kartine kazâsına tâbi‘ Daranya nâm karyeden olup bundan akdem vefât eden İsmail Bey’in sulbî sagīr oğlu Hasan’ın kıbel-i şer‘den mansûb vasîsi olan Musli Bey b. Zülfikār meclis-i şer‘-i hatîr-i lâzımü’t-tevkīrde mahmiye-i İstanbul’da Lâleli çeşme kurbunda sâkin erbâb-ı timardan Mustafa Bey b. Ali mahzarında üzerine da‘vâ edip bundan esbak bin kırk dokuz senesinde vâki‘ mart ibtidâsında kazâ-[i] mezbûra tâbi‘ Davreneş nâm karye dört bin altı yüz akçeye timar olmağın ber vech-i timar mutasarrıf olup fevt olan mezbûr İsmail mahlûlünden merkūm Mustafa Bey alıp bir sene mutasarrıf oldukdan sonra timar-ı mezbûru bin elli bir senesinde vâki‘ mart ibtidâsında mersûm İsmail’in sagīr oğlu merkūm Hasan’a ben kıbel-i şer‘den mansûb vasî olmağla sagīr-i mezbûr için mersûm Mustafa’dan berâtını alıp nizâ‘dan ferâğ mukābelesinde sagīr-i mezbûr malından iki yüz altmış kıt‘a riyâlî guruş yedine teslîm ve ol dahi vech-i mübeyyen üzre kabz ve tesellüm ettikden sonra timar-ı mezbûru vesâyet-i mahkiyem hasebiyle dört sene sagīr-i mezbûr için mutasarrıf olup sinîn-i mezbûrda hâsıl olan a‘şâr-ı şer‘iyye ve rüsûm-ı örfiyyesinden dört senede cânib-i saltanata lâzım gelen bedeliyyesini edâ ve teslîm ettikden sonra mahsûl-i tımâ[r]-ı mezbûrdan ancak elli guruş fazla kalıp hâlen mezbûr Mustafa Bey timar-ı mezkûru ferâğ memnû‘dur deyû müceddeden kendiye berât ettirmeğin mukābele-i ferâğda yedimden kabz eylediği iki yüz altmış guruşdan elli guruşunu zimmetimde olup timar-ı mezbûr mahsûlünden fazla olan elli guruşa takās edip meblağ-ı mezbûrdan mersûm Mustafa Bey’in zimmetinde bâkī kalan iki yüz on guruşu suâl olunup alıverilmesi matlûbumdur dedikde gıbbe’s-suâl müdde‘î-i mezbûr Musli Bey’in minvâl-i muharrer ve meşrûh üzre cârî ve sâdır olan cemî‘ kelimâtını merkūm Mustafa Bey bi’l-muvâcehe ikrâr ve tasdîk eylemeğin zikr olunan iki yüz altmış guruşdan elli guruşunu Musli Bey’in zimmetinde olup timar-ı mesfûr mahsûlünden fazla olan elli guruşa takās olunup iki yüz on mezbûrü’n-na‘t guruşun edâsına hüküm birle işbu hurûf bi’t-taleb ketb ve terkīm olundu. Tahrîren fi’l-yevmi’s-sâmin min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Ahmed Çavuş b. Mehmed el-Mübâşir, İsmail b. Hasan, Hasan Çelebi b. İbrahim, İskender Ağa b. ( ) Çeribaşı, Sinan Çelebi b. Ali Bey ve gayruhüm mine’l-huzzâr