Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 118 Hüküm no: 106 Orijinal metin no: [20a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Doreşi’nin zevcesi Vasiliki bt. Aslan’ı boşadığı Kıbtiyân tâifesinden Yorgi v. Doreşi nâm zimmî meclis-i şer‘-i hatîr-i lâzımda zevcesi işbu hâmilet-i hâze’l-kitâb Vasiliki bt. Aslan nâm Nasrâniyye muvâcehesinde ikrâr ve takrîr-i kelâm edip mezbûre Vasiliki âyin-i bâtılımız üzre menkûham olup hüsn-i zindegânemiz olmayıp müfârakat lâzım gelmeğin hâlen mezbûre Vasiliki’yi talâk-ı bâyin ile tatlîk eyleyip benden mutallaka olmuşdur dedikde mukırr-ı mezbûrun minvâl-i muharrer üzre cârî ve sâdır olan ikrâr ve takrîrini el-mukarru lehü’l-mezbûre Vasiliki bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā sebt ve imlâ olunup men lehü’t-taleb yedine vaz‘ olundu. Hurrire fi’l-yevmi’s-sânî aşer şehri Rebî‘ilâhir li sene erba‘a ve hamsîn ve elf. Şuhûdü’l-hâl: Mustafa Beşe el-Muhtesib, Ali Beşe el-Muhzır, İbrahim Çelebi b. Mustafa, Baba Süleyman [b.] Turgud, Kıbtiyân Mihal, Estopan [v.] Andriye