Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 118 Hüküm no: 107 Orijinal metin no: [20a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kadri Bey’in Mahmud Ağa b. Abdülmennân’a sattığı mülk menzil ve devrettiği vakıf menzil ile ilgili satış ve devir işlemlerini fesh ve ikâle ettikleri iddiası ve ispat edemediği Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî- mahallâtından İslâm Bey mahallesinde sâkin erbâb-ı zu‘amâdan zahrü’l-emsâl Kadri Bey el-ma‘rûf bi-Halil Paşazâde meclis-i şer‘-i hatîr-i lâzımü’t-tevkīrde işbu kitâb-ı sedâd-intisâbın hâfızı olan kıdvetü’l-emâsil ve’l-a‘yân Mahmud Ağa b. Abdülmennân taraf-ı karînü’ş-şereflerinden ikrâr-ı âti’l-beyânı tasdîke vekîl olup hasm-ı şer‘î-i câhid mahzarında Receb Bey b. Abdullah el-Cündî ve Mehmed Beşe b. Receb er-Râcil şehâdetleri ile şer‘an vekâleti sâbite olan fahrü’l-müderrisîni’l-kirâm Abdülganî Efendi b. Ömer’i ihzâr ve mahzarında üzerine da‘vâ ve takrîr-i kelâm edip bundan akdem Güzelce Mahmud Paşa evkāfı’ndan silk-i mülk ve tasarrufumda ve taht-ı yedinde münselik hakkım olup mahalle-i mezbûrede vâki‘ çiçek bahçesi demekle ma‘rûf bir tarafdan yine benim mülküm ve bir tarafı merhûm müşârün-ileyh Güzelce Mahmud Paşa oğlu Ahmed Bey menzili ve bir tarafı bayır ve bir tarafı tarîk-i âm ile mahdûd olup iki bâb fevkānî odaları ve iki sofayı ve altında ahırı ve kenîfi müştemil mülk menzilimi cümle tevâbi‘ ve levâhıkı ve kâffe-i menâfi‘ ve merâfıkı ile târih-i kitâb Saferü’l-hayrının on birinci günü müvekkil-i müşârün-ileyh Mahmud Ağa’ya doksan iki bin cedîd ve ceyyid râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve kabz-ı semen ve teslîm-i mebî‘ ettikden sonra yine hudûd-ı mezkûre dâhilinde vâki‘ menzil-i mezbûra muttasıl tahtânî matbah ve ona muttasıl hamamı ve su kuyusunu ve zât-ı eşcâr-ı müsmire ve gayr-ı müsmire hadîkayı ve havluyu ve dâhilinde iki buçuk dönüm bağı müştemil olup icâre-i mu‘accele ve senede iki yüz akçe müeccele ile mutasarrıf olduğum vakıf menzilin hakk-ı tasarrufunu dahi târih-i mezbûrede mütevellîsi ma‘rifetiyle müvekkil-i müşârün-ileyh Mahmud Ağa’ya sekiz bin nakd-i mezbûrü’n-na‘t akçeye tefvîz edip ol dahi vech-i mübeyyen üzre tefevvuz ve kabûl ettikden sonra mukābele-i bey‘ ve tefvîzde olan bir yük akçe i‘tibâr olunur yüz bin cedîd ve ceyyid râyic fi’l-vakt akçeyi müvekkil-i mûmâ-ileyh Mahmud Ağa yedinden tamâmen ahz u kabz edip teslîm-i mebî‘ eyledikden sonra müşterî-i merkūm Mahmud Ağa nâdim olup ikāle murâd eylemeğin ben dahi taleben li’l-ecr ve’s-sevâb mine’l-meliki’l-vehhâb ikāle ve akd-i mezkûru fesh edip kabz eylediğim meblağ-ı mersûm yüz bin akçeyi yedine teslîm etmiş iken hâlen müvekkil-i müşârün-ileyh Mahmud Ağa menzil-i mezbûru bana teslîmden imtinâ‘ eder, suâl olunup bana teslîm ettirilmesi matlûbumdur dedikde gıbbe’s-suâl vekîl-i mezbûr cevâbında akdeyn-i mezkûreyni ikrâr ber vech-i muharrer sudûr-ı ikāleyi inkâr edicek müdde‘î-i mezbûr Kadri Bey’den sıdk-ı makāline mutâbık beyyine taleb olundukda ityân-ı beyyine için istimhâl eylemeğin mehil-i şer‘î verilip mehl-i şer‘îden sonra ityân-ı beyyineden âciz olup istihlâf etmeğin müşârün-ileyh Mahmud Ağa dahi marîz olup meclis-i şer‘a ihzârı müte‘azzir olmağla küttâb-ı mahkemeden mevlânâ Hidâyetullah Efendi irsâl olunup ol dahi zeyl-i kitâbda mastûrü’l-esâmî olan bî-garaz müslimîn ile mûmâ-ileyh Mahmud Ağa’nın menziline varıp akd-i meclis ettiklerinde gıbbe’l-istihlâf müşârün-ileyh Mahmud Ağa dahi vech-i [20b ] muharrer üzre bey‘ ve tefvîzi fesh ve ikāle etmediğine yemîn billâhi’l-aliyyi’l-azîm edicek vâki‘ hâli mezbûr mahallinde tahrîr ba‘dehû gelip meclis-i şer‘de alâ vukū‘ihî ihbâr etmeğin mu‘ârazadan men‘ birle işbu hurûf bi’t-taleb ketb olundu. Hurrire fi’l-yevmi’s-sânî aşer min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Hüseyin Efendi b. Mehmed Şerîfezâde, Mahmud Efendi el-İmâm, Şaban b. Osman el-Müezzin, Süleyman b. Hasan el-Müezzin, Mehmed Çelebi b. Mehmed el-Müezzin, Hüseyin Beşe [b.] Yusuf el-Haccâr, Ali Beşe b. Mirza er-Râcil, Eyüb Çelebi b. Mustafa, Ali b. Abdülhalim Kahveci, Yusuf Efendi b. Mehmed el-Müderris, Abdülganî Efendi el-Müderris, Veli Çelebi b. İsâ, Receb Bey b. Abdullah, Rıdvan b. ( ), Ali b. ( ), Musli Ağa [b.] Haydar ve gayruhüm mine’l-huzzâr