Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 119 Hüküm no: 108 Orijinal metin no: [20b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Povderyani adlı köy halkına vekâleten cizye tahsilâtı yapan Yano v. Minho’nun Yorgi v. Jolo’nun cizye borçlarını talep ettiği ve sulh oldukları Vilâyet-i Rumeli’nde Yanya kazâsına tâbi‘ Povderyani nâm karyede sâkin kefere tâifesinin ittihâdı ve ittifâklarıyla karye-i mezbûre ahâlîsinden celâ-yı vatan edip âhar yerde tavattun eden zimmîlerin ber mûceb-i fermân-ı şerîf cizyelerini cem‘ ve tahsîle ahâlî-i karye-i mezbûre tarafından vekîl olup hasm-ı şer‘î-i câhid mahzarında Yorgi v. Yani ve Nikola v. İstati şehâdetleriyle şer‘an vekâleti sâbite olan Yano v. Minho nâm zimmî meclis-i şer‘de sâbıkan karye-i mezbûre zimmîlerinden olup hâlen mahrûse-i Galata’da Beyoğlu mahallesinde sâkin meyhâneci tâifesinden işbu hâmilü’l-kitâb Yorgi v. Jolo nâm zimmî muvâcehesinde bi’l-vekâle ikrâr ve takrîr-i kelâm edip mezbûr Yorgi’nin maskat-ı re’si karye-i mezbûre olup beher sene zimmetine edâsı lâzım gelen cizyesini ahâlî-i karye-i mezbûre ile ma‘an cem‘ine memûr olanlara edâ ve îfâ edegelmişken târih-i kitâbdan on beş sene mukaddem karye-i mezbûreden gidip mahalle-i mezbûrede tavattun eylemeğin mezbûr Yorgi’nin cizyesini ahâlî-i karye-i mezbûreden cem‘ine memûr olanlar ahz u kabz etmekle ben dahi vekâletim hasebiyle mezbûrun târih-i kitâba gelince on beş senede hâsıl olan güzeşte cizyesini da‘vâ ve taleb eylediğimde beynimizde münâza‘ât-ı kesîre edip es-sulhu seyyidü’l-ahkâm fehvâsınca dört yüz akçe üzerine beni inşâ-i akd ve sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûru dört yüz akçeyi vekâletim hasebiyle mezbûr Yorgi’nin yedinden ahz u kabz edip husûs-ı mezbûra müte‘allik da‘vâ ve talebden zimmetini ibrâ-i âm ile ibrâ ve iskāt-ı tâm ile iskāt eyledim ba‘de’l-yevm husûs-ı mezbûra müte‘allik benden bi’z-zât veyâhud bi’l-vekâle da‘vâ ve nizâ‘ sâdır olursa lede’l-hükkâmi’l-kirâm mesmû‘a ve makbûle olunmaya dedikde gıbbe’t-tasdîki’ş-şer‘î mâ vaka‘a bi’t-taleb ketb ve terkīm olundu. Tahrîren fi’l-yevmi’s-sâdis min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Mustafa Beşe el-Muhtesib, Ali Beşe el-Muhzır, İbrahim Çelebi el-Muhzır, Minho v. Kino, İstati v. Niyo, Nikola v. Estam?, Lambo v. Zolo, Hristo v. Yani, Yani v. Mano ve gayruhüm mine’l-hâzırîn