Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 120 Hüküm no: 109 Orijinal metin no: [20b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi, Şah Mehmed Çelebi ve Musa Çavuş’un evlâdına ait su bıçkısı hisselerinin Hızır Efendi b. Cafer’e satıldığı Vilâyet-i Anadolu’da Bolu sancağında kasaba-i Bendereğli sâkinlerinden olup hâlen mahmiye-i İstanbul’da ( ) mahallesinde sâkin fahrü’l-kuzât Mehmed Efendi b. İnâyetullah Efendi ve Şah Mehmed Çelebi ve İsmihân ve Ümmühâni Hâtun evlâd-ı Musa Çavuş meclis-i şer‘-i hatîr-i lâzımü’t-tevkīrde işbu kitâb-ı sedâd-intisâbın hâfızı olan kıdvetü kuzâti’l-İslâm zübdetü vülâti’l-enâm Hızır Efendi b. Cafer el-merhûm mahzarında bi’t-tav‘ ve’r-rızâ [21a ] her biri ikrâr ve takrîr-i kelâm edip zikr-i âtî akdin sudûruna değin ale’l-iştirâki’s-seviyye mutasarrıf olduğum emlâkden Samakov kazâsına tâbi‘ Kocaman suyu demekle ma‘rûf olan nehir üzerinde dâir olup tahdîd ve tavsîfden müstağnî su bıçkısı ta‘bîr olunur kârhâne ocağında Gürgen Yusuf’dan iştirâ olunan hisse-i şer‘iyye-i şâyi‘amızı cümle tevâbi‘ ve levâhıkı ve kâffe-i menâfi‘ ve merâfıkı ile müşârün-ileyh Hızır Efendi’ye yirmi kıt‘a riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledik ba‘de’l-yevm zikr olunan su bıçkısında olan hisse-i şâyi‘amızı mûmâ-ileyh Hızır Efendi’nin mülk-i müşterâ-yı sarîhidir keyfe mâ yeşâ’ ve yahtâr mutasarrıf olsun dedikde mukırrûn-ı mezbûrûnun vech-i mübeyyen üzre cârî ve sâdır olan ikrâr ve takrîrini el-mukarru [lehü]’l-mezbûr Hızır Efendi bi’l-muvâcehe tasdîk ve bi’l-müşâfehe tahkīk edicek mâ vaka‘a ketb ve terkīm olundu. Hurrire fi’l-yevmi’s-sânî aşer min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Fahrü’l-kuzât Receb b. Muharrem el-Kadı, Fahrü’l-kuzât el-Hâc Ali Efendi b. Hüseyin el-Kadı, Fahrü’s-sulehâ Mustafa Dede b. Musa, Fahrü’l-kuzât el-Hâc Osman Efendi b. Ahmed, Fahrü’l-kuzât Halil Efendi b. Mehmed, Fahrü’l-müderrisîn Bâli Efendi, Zahrü’l-mülâzımîn Ebûbekir Efendi, Ömer b. İbrahim, Osman b. Cafer ve gayruhüm mine’l-huzzâr