Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 121 Hüküm no: 110 Orijinal metin no: [21a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Afîfe Hâtun’un tasarrufundaki vakıf çayırı Receb b. Ahmed’e devrettiği ve temessük talebi Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Câmi‘-i Kebîr mahallesinde sâkin bâ‘isü’l-kitâb Receb b. Ahmed nâm kimesne meclis-i şer‘-i hatîr-i lâzımü’t-tevkīrde takrîr-i kelâm ve bast-ı merâm edip merhûm ve mağfûrun-leh Sultan Bayezid Hân -tâbe serâhu ve ce‘ale’l-cennete mesvâhu- hazretlerinin mahmiye-i Kostantıniyye -humiyet ani’l-âfât ve’l-beliyye-’de vâki‘ câmi‘-i şerîf ve imâret-i âmireleri evkāfından Havâss-ı Aliyye kazâsında Bergos cibâyetine tâbi‘ Lahne nâm karyede vâki‘ etrâfı sâbıkan defterdâr olan merhûm Ömer Efendi tarlası ve mâ-i cârî ile mahdûd tahmînen beş arabalık çayır beher sene vakf-ı mezbûra yirmi beş akçe mukāta‘ası olan bir kıt‘a çayıra mutasarrıfe olan umdetü’l-muhadderât ve zübdetü’l-muvakkarât tâcü’l-mestûrât iklîletü’l-muhassanât Afîfe Hâtun hazretleri mârrü’z-zikr çayırın hakk-ı tasarrufunu mütevellîsi ma‘rifet[iy]le iki bin cedîd ve ceyyid râyic fi’l-vakt akçeye bana tefvîz ve ben dahi vech-i mübeyyen üzre tefevvuz ve kabûl ettikden sonra mukābele-i tefvîzde olan meblağ-ı mârrü’n-na‘t iki bin akçeyi yedimden tamâmen ahz u kabz eyledikden sonra hâlen vakf-ı mezbûra mütevellî olan fahrü’l-emâsil ve’l-a‘yân Ebûbekir Ağa b. ( ) yedime hat ve hatmini müştemil temessük vermişdir, nazar olunup mûcebince kıbel-i şer‘den li ecli’l-istihkâm temessük verilmesini taleb ederim deyicek bin elli dört şehri Rebî‘ilâhirin târihi ile müverrah ve mütevellî-i müşârün-ileyhin hat ve hatmini müştemil temessük ibrâz edip nazar olundukda mazmûnu takrîrine mutâbık bulunmağın bu hurûf ketb ü tahrîr olundu. Tahrîren fi’l-yevmi’s-sâlis aşer min şehri Rebî‘ilâhir li sene erba‘a ve hamsîn ve elf. Şuhûdü’l-hâl: El-Hâc Ali b. ( ) el-Cündî, Cafer Çelebi b. Hasan er-Râcil, Mehmed Çelebi b. Ahmed er-Râcil, Ali Beşe el-Muhzır, İbrahim Çelebi el-Muhzır ve gayruhüm mine’l-hâzırîn