Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 122 Hüküm no: 111 Orijinal metin no: [21a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yamandi v. Tanaş’ın tasarrufunda olan on dört vakıf tarlayı Yani v. İstemad’a devrettiği Havâss-ı Aliyye kazâsına tâbi‘ Ayastefanos nâm karyede sâkin Kapranoğlu demekle ma‘rûf Yamandi v. Tanaş nâm zimmî meclis-i şer‘-i hatîr-i lâzımü’t-tevkīrde yine karye-i mezbûreden işbu hâmilü’l-kitâb Yani v. İstemad nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip tefvîz-i âtî sudûruna değin taht-ı yedimde ve tasarrufumda olup merhûm ve mağfûrun-leh Sultan Bayezid Hân -tâbe serâhu ve ce‘ale’l-cennete mesvâhu- hazretlerinin arâzi-i mevkūfesinden karye-i mezbûre sınırı dâhilinde vâki‘ inde ahâliyi’d-diyâr her biri ma‘lûmü’l-hudûd ve’l-mikdâr tahmînen elli keyl tohum isti‘âb eder on dört kıt‘a tarlanın hakk-ı tasarrufunu mütevellî-i vakf-ı mezbûr ma‘rifetiyle merkūma tefvîz ve ol dahi tefevvuz ve kabûl ettikden sonra mukābele-i tefvîzde olan on üç bin cedîd ve ceyyid râyic fi’l-vakt akçeyi merkūm Yani yedinden bi’t-tamâm ve’l-kemâl ahz u kabz eyledim ba‘de’l-yevm zikr olunan on dört kıt‘a tarla merkūmundur sâir [21b ] emsâli tasarrufu gibi mutasarrıf olsun dedikde mukırr-ı mezbûrun vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr Yani tasdîk edicek mâ hüve’l-vâki‘ gıbbe’l-ibtigā sebt olundu. Hurrire fi’l-yevmi’r-râbi‘ aşer min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Ali Bey b. Ömer Korucu, Davud Bey b. Ebûbekir er-Râcil, Mustafa Beşe el-Muhtesib, Ali Beşe el-Muhzır, Papa Velisa v. Papa Todori, Hırsanos v. Paskal ve gayruhüm mine’l-huzzâr