Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 122 Hüküm no: 112 Orijinal metin no: [21b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultana bt. Memişah ile Papa Hâtun bt. Kasım’ın sahib oldukları bağları mukâyaza usulüyle karşılıklı olarak birbirlerine sattıkları Vilâyet-i Rumeli’nde Premedi kazâsına tâbi‘ Vetşit nâm karyede sâkine Sultana bt. Memişah nâm hâtun meclis-i şer‘-i hatîr-i lâzımü’t-tevkīrde işbu hâmilü’l-kitâb Papa Hâtun bt. Kasım tarafından vech-i âtî üzre tasdîke vekîl olup hasm-ı şer‘î-i câhid mahzarında Mehmed Beşe b. Ali ve Mehmed b. Hasan şehâdetleriyle şer‘an vekâleti sâbite olan zevci Ali Beşe b. Abdullah mahzarında bi-tav‘ihâ ikrâr ve takrîr-i kelâm edip kazâ-i mezbûra tâbi‘ Gudvec nâm karye sınırında Pağra nâm mevzi‘de vâki‘ bir tarafdan mezbûr Ali Beşe bağına ve bir tarafdan Mehmed b. Şirmerd bağına ve bir tarafdan Mehmed b. Abdullah bağına ve bir tarafdan arz-ı hâliye ile mahdûd üç dip armut ve bir dip elma ve eşcâr-ı müsmire ve gayr-ı müsmireyi hâvî tahmînen yirmi beş çapalık bir kıt‘a bağdan nısf hisse-i şer‘iyye-i şâyi‘asını müvekkile-i mezbûre Papa Hâtun’a alâ tarîki’l-mukāyazati’ş-şer‘iyye müvekkile-i mezbûre Papa Hâtun karye-i mezbûre[de] Vetşit bağları dâhilinde vâki‘ bir tarafdan Hüseyin Beşe b. Hasan bağına ve iki tarafdan Ali Beşe b. Ali bağına ve bir tarafdan Hasan Beşe b. Hüseyin bağına müntehî bir kıt‘a bağ ve yine iki tarafdan Kara Hasan bağına ve iki tarafdan Hüseyin Beşe b. Hasan bağına müntehî bir kıt‘a bağ ki tahmînen iki çapalık iki kıt‘a mülk bağ ile altı yüz cedîd ve ceyyid râyic fi’l-vakt akçeye bey‘ ve kabz-ı semen-i mezbûr eyledikden sonra her birimizi âharı mahallinde kabza taslît eyledik ba‘de’l-yevm karye-i mezbûre Vetşit bağları dâhilinde hudûd-ı mezkûre ile mahdûd olup müvekkile-i mezbûre Papa Hâtun mülkü olan iki kıt‘a bağ benim mülküm olup ve karye-i mezbûre Gudvec sınırında mevzi‘-i merkūmda vâki‘ hudûd-ı sâlifü’l-beyân ile mahdûd olup benim mülküm olan bir kıt‘a bağdan nısf hisse-i şer‘iyyesin mezkûre Papa Hâtun’un mülküdür keyfe mâ teşâ’ve hasbe mâ türîd mutasarrıfe olsun dedikde mukırra-i mezbûrenin vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr bi’l-muvâcehe tasdîk edicek mâ hüve’l-vâki‘ bi’t-taleb sebt olundu. Tahrîren fi’l-yevmi’s-sânî aşer min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Kara Hasan b. Hüseyin, Durmuş b. Abdullah, Mehmed b. Hasan, Ahmed b. Mustafa, Mustafa b. Mehmed, Hasan b. Hüseyin, Sinan b. Mehmed, Bâli b. Hüseyin, Ali b. Hüseyin ve gayruhüm