Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 123 Hüküm no: 113 Orijinal metin no: [21b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdüllatîf b. Abdullah’ın boşandığı zevcesi Ümmühâni bir başkasıyla evlendiği için yanında bulunan kızı Fâtıma’yı bakımını taahhüd eden Mehmed Çelebi b. Musa’ya verdiği Mahmiye-i Kostantıniyye -humiyet ani’l-âfât ve’l-beliyye- hısnı ebvâbından Kumkapısı kurbunda ( ) mahallesinde sâkin Abdüllatîf b. Ali nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb Mehmed Çelebi b. Musa mahzarında takrîr-i kelâm edip zevce-i mutallakam olup gāibân ani’l-meclis olan Ümmühâni bt. Ahmed nâm hâtundan mütevellîde olan Fâtıma nâm sulbiye kızım sagīre olmağın merkūm Ümmühâni ile firkat vâki‘ oldukda hakk-ı hidâne ile mezbûre Ümmühâni yanında vaz‘ olunmuşdu el-hâletü hâzihî merkūme Ümmühâni ecnebîye tezevvüc etmekle hakk-ı hidâne sâkıt olup mezkûr Mehmed Çelebi dahi sagīre-i mezkûreyi bilâ-nafaka velâ kisve beslemeğe ta‘ahhüd etmeğin ben dahi merkūme Fâtıma’yı mû[mâ] ileyh Mehmed Çelebi’ye vaz‘ eyledim mâdem ki benden nafaka ve kisvesini taleb etmeye ben dahi mezbûre Fâtıma’yı mezkûr Mehmed Çelebi’den taleb etmem deyip mezbûr Mehmed Çelebi dahi mezkûr Abdüllatîf’in kelâm[ını] tasdîk etmeğin mâ hüve’l-vâki‘ bi’t-taleb ketb ve imlâ olunup men lehü’t-taleb yedine vaz‘ olundu. Hurrire fî müntasıfı şehri Rebî‘ilâhir li sene erba‘a ve hamsîn ve elf. Şuhûdü’l-hâl: Mustafa Beşe b. Mehmed el-Muhtesib, Ali Beşe b. Mustafa, İbrahim Çelebi b. Mustafa, Baba Süleyman b. Turgud ve gayruhüm mine’l-huzzâr