Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 124 Hüküm no: 114 Orijinal metin no: [22a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kâmile bt. Abdullah’ın vârislerinden Sefer ve Mustafa’nın mirastan paylarına düşen ev hissesini Rıdvan b. Abdullah’a sattıkları Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Düğmecibaşı mahallesinde sâkinler iken bundan akdem fevt olan Kâmile bt. Abdullah nâm hâtunun verâseti sulbî kebîr oğlu Mehmed Çelebi b. Sefer ve zevc-i metrûkü Rıdvan b. Abdullah nâm kimesneye münhasıra olduğu şer‘an mütehakkik oldukdan sonra kable’l-kısmet merkūm Mehmed dahi fevt olup verâseti usûbet-i nesebiyye cihetinden li ebeveyn ammisi oğulları Sefer ve Mustafa ibney Üveys nâm kimesnelere münhasır olmağın merkūmân Sefer ve Mustafa meclis-i şer‘-i hatîr-i lâzımü’t-tevkīrde işbu râfi‘ü’l-kitâb Rıdvan b. Abdullah nâm kimesne mahzarında bi’t-tav‘ ve’r-rızâ her biri ikrâr ve takrîr-i kelâm edip müteveffâ-yı merkūmun muhallefâtından mahalle-i mezbûrede vâki‘ bir tarafdan Nazilli Kapıcı demekle meşhûr Mehmed Ağa mülküne ve bir tarafdan mezbûr Rıdvan mülküne ve bir tarafdan merhûme Muhsine Hâtun vakfı’na ve bir tarafdan tarîk-i hâssa müntehî bir beyt-i süflîyi ve havluyu müştemil olan menzilin rub‘-ı şâyi‘i müteveffâ-yı mezkûre Kâmile’nin zevc-i metrûkü merkūm Rıdvan’a ve selâse erbâ‘ı sadrî oğlu Mehmed’e intikāl edip fevt olmağın usûbet-i nesebiyye cihetinden vârisi olduğumuz ecilden bize intikāl eylemişdir el-hâletü hâzihî menzil-i mezbûrdan hisse-i şer‘iyye-i şâyi‘amız olan selâse erbâ‘ını mezbûr Rıdvan’a iki bin cedîd ve ceyyid râyic fi’l-vakt akçeye tarafeynden îcâb ve kabûlü hâvî bey‘-i kat‘î [ile] bey‘ ve ol dahi vech-i mübeyyen üzre iştirâ ve tesellüm ettikden sonra semen[i] olan meblağ-ı mârrü’n-na‘t iki bin akçeden her birimize isâbet eden bin akçeyi merkūm Rıdvan yedinden bi’t-tamâm ve’l-kemâl ahz u kabz eyledik, ba‘de’l-yevm menzil-i mahdûd-ı mezkûr ve menkūlâtdan selâse erbâ‘ı merkūm Rıdvan’ın mülk-i müşterâ-yı sarîhidir keyfe mâ yeşâ’ ve hasbe mâ yürîd mutasarrıf olsun dedikde mukırrân-ı mezbûrânın vech-i mübeyyen üzre cârî olan ikrâr ve takrîrini el-mukarru lehü’l-mezbûr Rıdvan bi’l-muvâcehe tasdîk edicek mâ hüve’l-vâki‘ ketb olundu. Hurrire fi’l-yevmi’r-râbi‘ aşer min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Es-Seyyid Ali Efendi b. es-Seyyid Mehmed, el-Hâc Fethullah b. Yahya, Mahmud Efendi b. Hasan el-Hatîb, Mustafa Efendi b. ( ) el-İmâm, Halil Halîfe b. ( ) el-Müezzin, Ramazan b. Mehmed er-Râcil, el-Hâc Ali b. Abdullah ve gayruhüm mine’l-huzzâr