Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 125 Hüküm no: 115 Orijinal metin no: [22a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Yani’nin mülk meyhânesinin yarı hissesini Niko v. Batoş’a sattığı Havâss-ı Aliyye kazâsına tâbi‘ İncirli nâm karye sâkinlerinden Dimo v. Yani meclis-i şer‘-i şerîfde işbu râfi‘ü’l-kitâb Niko v. Batoş nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûreye karîb Taşlık nâm mevzi‘de vâki‘ ilâ hîni sudûri hâze’l-akd silk-i mülk-i sahîhimde münselik olup bir tarafdan Kiro v. Avyora nâm zimmî meyhânesi ve bir tarafdan Lankari v. Kiro meyhânesi ve bir tarafdan dere ve [bir] tarafdan tarîk-i âm ile mahdûd olup bir süflî beyti müştemil olan mülk meyhânemin nısf-ı şâyi‘ini bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mezbûr Niko’ya bin beş yüz nakd-i râyicü’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi ber vech-i muharrer iştirâ ve tesellüm eyledikden sonra semen-i mezbûrü’n-na‘t bin beş yüz akçeyi yedinden tamâmen ahz u kabz eyledim ba‘de’l-yevm mârrü’z-zikr meyhânenin nısf-ı şâyi‘i merkūm Niko’nun mülk-i sahîh ve sarîhidir keyfe mâ yeşâ’ ve hasbe mâ yürîd mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb ve terkīm olundu. Tahrîren fi’l-yevmi’l-hâmis aşer min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Ali Beşe b. Mustafa, Mustafa b. Mehmed el-Muhtesib, Baba Süleyman b. Turgud, İbrahim Çelebi b. Mustafa, Yani v. Angeli, Koço v. Parando, Lankari v. Kiro, Kiro v. Avyora, Papa Yani v. Aleksi, Minho v. Poma, Vasil v. ( ) ve gayruhüm mine’l-huzzâr