Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 125 Hüküm no: 116 Orijinal metin no: [22a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sadreddin Efendi b. Mehmed’in oğlunu ölümünden sonra borçlarını ödemek için vasî tayin ettiği ve Boyacılar Çarşısı’ndaki dükkânını daha önce Ahmed Çelebi’ye hibe ettiği Mahmiye-i Edirne mahallâtından el-Hâc Safâ mahallesinde sâkin Sadreddin Efendi b. Mehmed meclis-i şer‘de işbu hâfızü’l-kitâb sulbî oğlu Osman Çelebi nâm müderris mahzarında takrîr-i kelâm edip ecel-i bî-mehil hulûl ve sandûk-ı zemen? nukūl müyesser oldukda mezbûr Osman Çelebi vasiyy-i muhtârım olup Hancızâde Ahmed Çelebi’ye olan bin akçe ve el-Hâc Safâ vakfı’na olan dört bin akçe ve Malkoçzâde Ali Çelebi’ye olan on bin akçe ve İstanbullu el-Hâc Hasan’a olan yedi bin akçe ve Kalbûrî el-Hâc Hürrem vakfı’na olan bin beş yüz akçe ve Havvâ bt. el-Hâc Abdülgaffâr nâm hâtuna olan on beş bin akçe düyûnlarımı muhallefâtımdan edâ ve îfâ edip vasiyy-i muhtâr nasb ve ihtiyâr eyledim dedikde ol dahi vesâyet-i merkūmeyi kabûl ve hizmet-i lâzımesini edâya ta‘ahhüd ettikden sonra mezbûr Sadreddin Efendi bin yirmi beş selh-i Şevvâli’nde Hüseyin b. Haydar nâm sabbâğdan Boyacılar sûkunda vâki‘ ayda on akçe mukāta‘a-i zemîni olup cevânib-i erba‘ası Sarı Hasan vakfı ve köle dükkânı ve tarîk-i âm ile mahdûd sabbâğ dükkânını içinde mevcûd iki kazgan ve iki hüsrevânî küp ve iki taş ve sâir boyacılık âlâtı ile bi-safkatin vâhidetin dokuz bin akçeye iştirâ ettiğim mülk-i müşterâm olan dükkânımı mezbûr Ahmed Çelebi’ye mukaddemâ hibe-i şer‘iyye ile hibe ve teslîm ol dahi ittihâb ve tesellüm etmişdi, min ba‘d mülk-i mevhûbudur benim alâka ve medhalim yokdur deyicek gıbbe’t-tasdîki’l-mu‘teber mâ vaka‘a ketb olundu. Hurrire fî evâhiri Cumâdelâhire li sene erba‘a ve hamsîn ve elf. Şuhûdü’l-hâl: Sofu Eyüb Bey b. Receb, el-Hâc Ahmed Beşe b. Pîr Mehmed, …? Mustafa b. Mehmed, Ali Beşe b. Mustafa, Musa b. Mehmed , Süleyman ..?